/  
بیریمجی صحیفه » خبرلر » اۇرمو بیلیم‌یۇردوندا تۆرك ديللي درگی‌لره قارشی باسقی‌لار آرتماقدادیر

اۇرمو بیلیم‌یۇردوندا تۆرك ديللي درگی‌لره قارشی باسقی‌لار آرتماقدادیر

اوغوز تی وی:بیلدی‌یینیز کیمی، کئچن ایل قیشین اوْرتا آییندا، «دنیز» درگی‌سی اۇرمو بیلیم‌یۇردونون درگی‌لره باخان کمیته‌سی طرفیندن ۶ آی بوْیونجا یاییمدان دۇردورولدو.
ایندیسه، اوْ اوْلایدان یاخلاشیق ۴ آی سوْنرا، اۇرمو بیلیم‌یۇردوندا تۆرك ديلينده یاییملانابیلن تكجه درگی، بیلیم‌یۇردون درگی‌لره باخان کمیته‌سی طرفیندن باسقی‌یا اۇغرادیلماقدادیر. بۇگۆن یوْل درگیسی‌نین سوْروملو یؤنه‌دیجیسی، بۇ درگی‌نین سوْن سایی‌سیندا یاییملانان یازی‌لاردان دوْلایی، بیلیم‌یۇردون درگی‌لره باخان کمیته‌سی طرفیندن گؤندریلمیش سۇچلاما(اتهام) ایچه‌ریکلی بیر گؤندری ایله قارشیلاندی. بۇ سۇچلاما گؤندریسینده گتیریلن بؤلوم‌لرین کؤکسوز اوْلدوغونا باخمایاراق، اوْنلارلا ایلگیلی بیرنئچه اؤنملی قوْنونو وۇرغولاماق ایسته‌یردیم:
توْخوندوق‌لاری ایلک قوْنو لاتین الیفباسی دیر. دئمه‌لییم، درگی‌لرین یاییم قۇرال‌لاریندا(آیین نامه) لاتین الیفباسی‌نین ایشله‌دیلمه‌سینه‌ قارشی هئچ بیر قاداغا قوْیولمامیشدیر. بۇنونلا بئله، یوْل درگیسی‌نین ایچ یازی‌لاریندا لاتین الیفباسی قۇللانیلمامیشدیر و درگی‌نین قابیغیندا ایشله‌نن یازی الیفباسی یالنیزجا بیر طرح ساییلابیلر.
گتیردیک‌لری ایکینجی قوْنو درگی‌نین تۆرك ديللي يازي‌لاريدير. ورغولامالي‌يام، درگی‌ده یازیلان تۆم تۆرکجه مقاله‌لر آذربایجان تۆرکجه‌سینده یازیلمیشدیر. آما بۇنلارین تۆرکجه‌دن آنلادیقلاری یالنیزجا بیرنئچه سؤزجوکده خلاصه اوْلونور و بۇ سؤزجوک‌لرین دیْش و خاریجینده ایشلنمیش تۆم سؤزلر آذربایجان تۆرکجه‌سیندن ساییلماییب، ایستانبول تۆرکجه‌سی دئیه بیر اؤزگه(!) دیله باغلانیلیر. معیار دیل`دن نسه آنلامایان ائله‌جه‌ ياشام‌لاريندا بير صفحه بيله تۆرك ديلينده يازي اوْخومايان بۇ آدام‌لار، تۆركجه يازيلميش مقاله‌لرده بیرسیرا سؤزلری باشا دۆشمه‌دیک‌لریندن دوْلایی، درگی‌نین تۆرکجه یازی‌لاری‌نین معیار دیلده دئییل، فارسجایا بۇلاشمیش بیر تۆرکجه‌ده یازیلماسینی ایسته‌ییرلر. اۆسته‌لیک، اۇرمو بیلیم‌یۇردوندا دنیز و یوْل درگیسی‌نین تۆرکجه- فارسجا دئیه ایکی دیللی درگی اوْلماسینا باخمایاراق، تۆرکجه یازیلمیش مقاله و بؤلوم‌لرین فارسجایا چئویریلمیشینی ده درگی‌نین یانی‌سیْرا گتیریلمه‌سینی ایسته‌ییرلر!
آرتیرمالی‌یام، اۆستده سیْرالادیغیم قوْنولارین هئچ بیرینه “ایراندا درگی‌لرین یاییم قۇرال‌لاری”- دا قاداغا قوْیولمامیشدیر و بۇنلار یالنیز اۇرمو بیلیم‌یۇردونون درگی‌لره باخان کمیته‌سی‌نین قوْنداردیغی قانون‌لاردیر. آیریجا، اۇرمو بیلیم‌یۇردوندا سس‌سیزجه قوْنداریلان بۇ قۇرال‌لار دنیز و یوْل آدلی تۆرك ديللي درگی‌لرین سوْروملولارینا بیلدیریلمه‌میش و ابلاغ اوْلونمامیشدیر!
قالان سۇچلامالار دا اۆستده‌کی‌لره تای کؤکسوز و اساس‌سیز دیر. یوْل درگیسینده یاییملانان هئچ‌بیر مقاله اۇیدو کانالی ویا سیته‌دن گؤتورولمه‌میش و یازی‌لار، بیرباشا یازارلارین اؤزوندن آلینمیشدیر. ائله‌جه‌ده حضرت محمد`ین آدینی یازییا اۇیغون اوْلاراق “محمد” بیچیمینده یازماق، کسینلیکله سایغیسیزلیق آنلامینا گلمز. سوْنونجو سۇچلامانین اؤرنک وئریلمه‌دن اوْرتایا قوْیولوشوندان دوْلایی یانیتلاماغی دا گرکسیز و بوْشونادیر.
سایغیلاریملا
دنیز درگیسی‌نین سوْروملو یؤنه‌دیجیسی

دنیز14

Comments,Baxışınız
oguz gif telegram