/  
Ön yapraq » خبرلر » حسین نیهال آتسیز حاقیندا قیسا بیر تانیتیم. یازار :دامغا

حسین نیهال آتسیز حاقیندا قیسا بیر تانیتیم. یازار :دامغا

اوغوز تی وی:بیر دوشونجه آدامی اولان نیهال آتسیز، آتا طرفین‌دن اصالتا‌ گوموش خانه لی اولمالارینا باخمایاراق، آتاسینین دنیز ضابطی اولماسی سببیله ایستانبول‌ دا دوغولموش اورادا یئتیشمیش‌دیر.

تورکییه‌نین کو‌مونیزم، ایسلام‌چی‌لیق،کوردچولوک کیمی ضررلی آخیملاردان تاثیرلندیی تورکلویون بو اوچ جبهه‌یه قارشی محاربه وئردیی بیر موحیط‌ده، تورک بودونو(میلتی) اولاراق وارلیغیمیزی قورومانین بیر یولونو آراشدیران آتسیز، چوخ کئچمه‌دن قورتولوشون یولو تورک میللیتچیلییینده اولماسی یعنی تورکچولوکده- اولدوغونو اؤیرنمیش و حیاتینین سونونا قدر بو ایده‌آلی و تورک عیرقی (سویو،نیژادی) اوزرین‌ده حاکم قیلماغا چالیشمیش‌دیر.

آتسیز، دیل. ادبیات و تاریخ ساحه‌سین‌ده دؤورون ایره لیده (اونده) گلن علم آداملارین‌دان درسلر آلمیش، بو ساحه‌ده اوزمانلاشمایا چالیشمیش‌دیر.حال حاضردا بئله اونیوئرسیتلرین دیل،ادبیات و تاریخ حیسه‌لرین‌ده تدریس کیتابلارین یازارلارینین بیرچوخویلا عینی صینیف‌ده اوخوموش و یا اونلارلا دوشونجه‌لرینی پایلاشاجاقلاری موحیطلرده اولموشدور. بونا گؤره ده اؤز ساحه‌سین‌ده اوزمانلاشماسی و گئنیش بیر گؤروشه مالیک اولماسی اوزون سورممیش‌دیر.آپاردیغی بیلیمسل آراشدیرمالار و یازدیغی کیتابلار اونون جیدی چالیشقان بیر علم آدامی اولدوغونون آچیق-آشکار دلیلی‌دیر. بونا گؤره آتسیز، هر شئی‌دن اول بو شخصیتیله تقدیر گؤرمه‌سی لازیم اولان بیر شخصیت‌دیر. یاشادیغی دؤورون ان اوستا تاریخچیلرینین دیلچیلرینین یاخین دوشه بیلمه دیکلری قونولار اوزرین‌ده ان اینجه دئتاللارینا قدر آراشدیران، علمی ساحه‌ده چوخ قیمت‌لی اثرلره دامغا ووران نیهال آتسیزین حیاتی بویونجا داوام ائد‌ن ایشلری، کیتاب و مقاله‌لرینین سایییلا بئله باشا دوشولور.

آتسیز، حیاتی بویونجا تورکچولویوندن هئچ بیر زامان باج(ایمتیاز) وئرممیش، یازدیغی یازیلار و چیخاردیغی ژورناللار اوزون‌دن بیر چوخ دفعه محکمه‌لیک اولماسینا، تابوتلوقلاردا(قارانلیق ایشگنجه اوتاقلاری) ایشگه‌نجه‌لر گؤرمه‌سینه باخمایاراق دوشونجه‌لرینی قطعیتله و هارای چکه چکه مدافعه ائد‌ن بیر اولکو اری‌دیر. سرت اولوب، قرارلی دوروشو، اونون نه قدر تورکچولویه قارشی اولانلارین -چوخلوقدا دا تورک سویلو اولمایانلارین- دوشمه‌ن‌لیکلرینه سبب اولموش اولسا دا، بو آداملارین وئردیی ضررلر آتسیزین بیر بوزقورد کیمی باشی دیک یاشاییشین‌دا ان کیچیک بیر باج ورمه یه سبب اولمامیش‌دیر.
آتسیز، اولغون (یئتکین) یوکسک بیر شخصیته مالیک جدی بیر کاراکتئره مالیک اولدوغون‌دان، یئنه تقدیر ائدیلمه‌سی لازیم اولان بیر داعوا آدامی‌دیر.

کئچه‌ن عصر ایچین‌ده رومانلار،شعیرلر،حکایه‌لری یازان چوخ یازار /شاعیر واردیر ؛ فقط بونلار ایچیندن چوخ آزی آتسیز کیمی بؤیوک بیر کوتله‌نی حرکته کئچیره بیلمیشدیر. آتسیزین یازیلارین‌دان و درسلرین‌ده‌کی دانیشمالارین‌دان تأثیرلنه‌ن میلیونلارلا تورک گنجی، تورکچولوک بایراغینین بیر داشیییجی‌سی اولاراق ایده‌آللارینا باغلی قالمیش، باش قویدوقلاری یولدان دؤنمه میشدیلر. بو گون ده آتسیزین رومانلارینی اوخویانلار ، تورکلوک سئوگیسیله اؤزلرین‌دن کئچمک‌ده، روحلارییلا اوچوب گئتدیکلری تانری داغیندا بیر دستانی یاشاییرجاسینا اسدیرمکده دیلر.نتیجه ده بئله تأثیر ائدیجی و سوروکلییجی یازیلار یازدیغی اوچون آتسیز یئنه تقدیره لاییق بیر یازاردیر.

Comments,Baxışınız
oguz gif telegram