/  
صفحه اصلی‌ » تحلیل ومقالات » بیرینجی اؤیرنجی؛ بیرینجی اوستاد- سعید موغانلی

بیرینجی اؤیرنجی؛ بیرینجی اوستاد- سعید موغانلی

اوغوز تی وی: سعید موغانلی: گؤره‌سن تزه‌جه تبریزده قورولان تورک دیلی رشته‌سینده آد یازدیران ایلک گنج کیمدی؟

سعید موغانلی- یازار

جمعی اوچ گون قالیر بو رشته‌نین “ثبت‌نام”ی اوچون!..

چوخ ماراقلانیرام آذربایجان تاریخینده بیرینجیلییی قازانان بو شخصی تانییام و یاخیندان گؤرم.

گؤیلومه دوشور، گؤزلرینه باخام و بیردن ائله دوشونم‌کی ستارخانین گؤزلرینه باخیرام. شهریارین او شهلا گؤزلرینه باخیرام.

یا دا علی موسیو، حاج مهدی کوزه‌کنانی ایله اوز‌اوزه دورموشام.

ائله گؤیلومه دوشوب باغریما باسام و قولاغینا یاواشجا پیچیلدایام؛ “سن بیزیم بایراغیمیزسان…”

یوخ،  دئیم کی، “سنی جواد هئیت قدر سئویرم.”

بلکه ده دئییم؛  “سنی آنام و دیلی قدر سئویرم”.

*

مدرن آذربایجانین قهرمانی منجه اودور…

هر بیر قارامسارلیغا رغما، مشروطیت‌ده کی اودوزدوغوموز سیلاحی آتیب تاریخ دره‌سینین دیبینه و بیر “بیک” قلمی ایله بیزیم قهرمانیمیز اولماغا چالیشیر…

سئویرم، سئویرم، سئویرم سنی…

*

او گنجین آدینی تاپیب تبریزین ایلکین‌لر تاریخینده ثبت ائتمه‌لییک.

و‌ها بئله آذربایجان دیلی و ادبیاتی‌ رشته‌سینین ایلک اؤیرنجی‌سی و یا ایلک کلاسا گیرن ایلک اوستادی کیم اولاجاق گؤره‌سن؟!

*

ائودن کیفینی آتاسان چییینینه،

-آنا منیم مدرن آذربایجان نثری درسیم وار، بیر آز چتیندی، دوستلارلا اوخومالی‌یام، گئج گله‌جم ائوه، دئییب، شئشیلله‌نه‌شئشیلله‌نه چیخاسان ائودن!..

سورا کلاسدا اوتوروب “وارلیق مکتبی” آدلی درسه قولاق آساسان و اوستادلا قیزغین مباحثه‌یه گیره‌سن کی، خئییر منجه دوکتور نطقی‌نین نقشی وارلیق مکتبینده دوکتور هئیت‌دن آز دئییل…

و درسین اورتاسیندا بیردن دوروب اوستادین آلنیندان اؤپوب، سانکی ساواش دؤنمی مهدی باکری‌نین آلنیندان اؤپن کیمی افتخارلا قاییدیب دینمزجه اوتوراسان کؤهنه صندلینده!

من حوزه‌ده اوخویارکن، درس اورتاسیندا آشیخ حسن‌زاده آملی‌نین آلنیندان اؤپموشم، چوخ گؤزل حسی وار اوستادا بئله‌جه تشکور ائتمک…

*

تورک دیلی رشته‌سی‌نین بیرینجی فارغ‌التحصیلی اولماق و او بیرینجی‌لری یاخیندان گؤرمک ده گؤزل بیر لحظه‌دیر.

او زامان اونلارین یانیندا دیلیمیز گوده اولاجاق! اونلار بو گؤزل دیلی سیستماتیک اوخویوب، اؤیره‌نیب‌لر و بیز، گیزلین مطالعه ایله اؤیرنمیشیک، هر حالدا اونلار بیزی ووروب کئچه‌جک‌لر و من ایندی‌دن اونلارا اوستاد دئمه‌یه جان آتیرام و باش اییرم.

– سالام سئوگیلی دیلیمین، سایین اوستادلاری…

– بیر نئچه یئرده موشکولوم وار، اونو منه اؤیره‌درسینیزمی؟ مینتدار اولارام اوستاد…

دؤرد ایلدن سونرا، بیری چاغیرسا پایاننامه دفاعسیندا اشتراک ائتمه‌یه ده جان آتیرام.

بئش ایلدن سونرا اونلار قاییدیب بوتون دانشگاهلاردا یارانان آذربایجان دیلی و ادبیاتی رشته‌سینه درس وئره‌جکلر، و سونرا بوتون دبیرستان‌لار و مدرسه‌لرده تورک دیلی اوستادلاری اونلار اولاجاقلار… پهووووووووو نه قدر خوشبختلیک وار گله‌جکده…

من شخصا بیرینجی یازیلان شخصی، بیرینجی کلاسا گیرن اؤیرنجی‌نی، بیرینجی اوستادی، بیرینجی کلاسی، و یا او رشته‌نین قورولاجاق بیرینجی دانشگاه و یا دانشکده‌نی، بیرینجی فارغ‌التحصیلی، و بوردان چیخان بیرینجی معلمی و اوستادی… خلاصه هر‌نه‌یین بیرینجی‌سینی، بیرینجی‌لر شهری اولان عزیز تبریزده تانیماق و یاخیندان گؤرمک و گؤزلریندن اؤپمک آرزوسوندایام…

تورک دیلینین گله‌جک اوزمانلارینا درین سایقی و سئوگی ایله:

کیچیک شاگیردینیز سعید موغانلی

قایناق یول پرس

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture