/  
بیریمجی صحیفه » مقاله لر و باخیشلار » ال داشی – دئو داشی
ال دا آزربایجان تورکونون اوجا سئسی ? ? اوغوزتی‌وی OğuzTV ? @oguztv ???شی - دئو داشی

ال داشی – دئو داشی

اوغوز تی وی:«آذربایجان خالقینین سوی کؤکونو دوشونرکن» کیتابینین یازاری میر علی سیدوف و تبریزلی یازار سید سلامتین «اصلی-کرم» کیتابینا اساسلاناراق چوخ،چوخ قدیم زامانلار آذربایجان جغرافیاسیندا انسانلار دونیانی ایکی وارلیغین یان-یانا دورماسیندا معنالاندیرارمیش لار. دونیانین بیر یاندا ایشیقلیق بیریاندادا قارانلیق دورموش. بوتون یاخشیلیقلاری ایشیقلیدان بوتون پیسلیک لریده قارانلیقدان بیلرمیش لر. قارانلیقلا ایشیقلیق آراسیندا دا همیشه ساواش اولارمیش. پیس – یاخشیدان ، یاخشیدا پیس دن اینتقام آلماغا چالیشارمیش. آنجاق یاخشینیدا پیسیده اولو تانری«الله» یاراتدیغی اوچون هئچ بیری آرادان گئتمزمیش.انسان اوغلودا یاخشیلیغن یا پیس لیین یوزه-یوز آرادان گئتمه دییی اوچون انسان یالنیز سئچه بیلر یاخشیلیغا ساری اولسون یا پیس لییه! «تانری یارادانی تانری آرادان آپارار»

مین دوشونوب بیر ایش گؤرن آتا- آنالاریمیز اؤزللیکله ده اولو بیلگه لریمیز«عالم لر» ایشیقلیق دونیاسییلا قارانلیق دونیاسینا اولان اینانجلاری میللتین هامیسینین دوشونوب بیلمه یی اوچون بوتون تورک توپراقلاریندا اؤزللیک له آذربایجانین بیر چوخ کندلرینده شهرلرینده اونلارا بعضی بینالار یا قوتسال یئرلر تیکمیش لر. او یئرلردن بیریده قاراداغیمیزین دؤیونن اوره یی اولان دیزمار چوخوروندا یئرلشین «اندیرگان» کندیمین «ال داشی-دئو داشی» یئری دیر.

«ال داشی»
«ال/آل» تورک دیلیمیزده ایشیغین شعاع لارینا دئییلر. اود بتر یانیب هاللالایاندا دا دئیرلر «اود ال ولویور» یانی بتر ایشیق وئریر، اود برک یانیر.«ال/آل» ایشیقلیق دونیاسینی،یاخشی لیقلار دونیاسینی میللته گؤرستمک اوچون کندین باغلیق، یام یاشیقللیق یئرینده تیکیلمیش!
بیر چوخ یئرلرده اولدوغو کیمی کندین «ال داشی» اوستونده بیر دنه انسان الینین ایزینه اوخشار ایز وار.بو ایز اینسانی یاخشیلیقلارا، ایشیقلیقلارا ال آتماسینا بیر چاغیریش دیر. میللت ده ائله بو اوزدن چوخ قاباق زامانلاردان تا سون زامانلارا دک چالیشاردی کسدییی قوربانلیقدا،ائت دییی یاخشی لیقدا، احسانیدا بو قوتسال یئرده اولموش اولسون!

«دئو داشی»
آذربایجان ناغیللاریندادا گؤروندویو کیمی میللتیمیز پیس بیر وارلیغین آدینی کی همیشه یاخشیلیقلارا دوشمن دیر «دئو» آدلاندیرمیشلار. «دئو داشی» دا قارانلیق دونیاسینی،پیسلیکری میللته گؤرست سین دئیه قوراقلیق بیر یئرده دوز «ال داشی» یلا قاباق-قاباغا تمثیل اولموش. دئو داشینین بؤرونده ده بیر یئکه قیلینج چاپیغینا اوخشادیلمیش یئر وار.بو چاپیق ایشیقلیغین قارانلیغین باغرینا یارا سالا بیلدیینی آنلادیر.انسانا اومود وئریرکی قارانلیقلا پیسلیک لرین قولو اولان دئولردن قورخماسینلار.

«حاققین ایپی اینجه لر آما قیریلماز» دئیه ده چوخ،چوخ قدیم لردن اندیرگانلیلاردا سینه دن سینه یه گلمیش بیر سؤزلری وار کی دئییلیر «هر گئجه دئولر باشلایار دئو داشینی یالایا-یالایا یئمه یه، او قدر داشی یالایارلار کی داشدان تکجه بیر سوغان قابیغی قالار کی دای داش قورتارسین! ائله او آندا بیردن بیره گون چیخار، ایشیق یاییلار. دئولرده ایشیغین قورخوسوندان قاچماق ایسته ینده یالادیقلاری قاییدار یئنه داش اولار» بو سؤزده پیسلیک لرین یاخشیلیقلارا اوستون گله بیلمه دیینی ، ظولوم باشا گئتمه دیینی آنلادییر.

ال داشییلا دئو داشینا باغلی اولان میللی اینانجلاریمیز میللتیمیزین اسلام دینی نی قبول ائدیب شاه بابا آدلانان شاه اسماعیل دان بو اوزه شیعه اولدوغوموزدا بیر آز دئییشیلمیش لر،میللی اینانجلاریمیز دینی-مذهبی شکلینده اؤز یاشاییشینی ائتمیش لر.
شیعه لیک دن بو اوزه «ال داشی» شیعه لیین بیرینجی امامی اولان حضرتی علی(ع) آدییلا ایلگی لنمیش. «ال داشی» نا کندلرین بیر سیراسی ائله لاپ قدیم لردن نسیلدن نسیله آخیب گلن اؤز آدینی دئمیشلر. بیر سیرالاریدا «علی داشی» دئمیشلر. دئییشلره گؤره حضرت علی او داشی دوشمن لریله ساواشاندا آتمیش. دئو داشینیندا بؤرونده اولان چاپیق حضرت علی نین قیلینجینین چاپیغیدی.

رامین جبرائیلی اندریان«یاشار»

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture