/  
بیریمجی صحیفه » مقاله لر و باخیشلار » اوغوز تی‌وی ده ۱۸۰ درجه پروگرامينين موضوع سونا و سسلنن دوشونجه‌لره تحليلي باخيش – آيدين مارالاني

اوغوز تی‌وی ده ۱۸۰ درجه پروگرامينين موضوع سونا و سسلنن دوشونجه‌لره تحليلي باخيش – آيدين مارالاني

اوغوز تی‌وی :اوغوز تی وی نین ۱۸۰ درجه پروگرامیندا «آذربایجان شهیدی کیمدیر؟» عنوانی آلتیندا مصاحبه ده ، ایکی قیمتلی ، یاخیندان گوروب تانیش اولدوغوم سوی داشیمین چوخ اونملی بیر موضوع حقینده کی مباحثه لرینی ایزله دیم، و کامرانی بئی و بوتون اوغوز تی وی ائمک داشلارینا بوایله فایدالی و یون وئریجی پروگراملاری حاضیرلادیقلاری اوچون منت دارلیغیمی بیلدیرمه لیم .

عزیز سویداشلار، آزادلیق سئور اینسانلار!
بو دوستلارین صداقت، وطن سئورلیک، و اوره کلرینین آزادلیق اوچون چارپدیقلارینا هئچ بیر شبهه م یوخ ، هر ایکیسی ایللر بویو میللی حرکت ده ائمک وئره ن عزیز قارداشیمدیلار!
اما طبیعی اولاراق اوراداکی تارتیشما و اورتایا قویولان موضوع ایستر–ایسته مز بوتون آذربایجانلیلاری و اوزللیک ایله میللی فعاللاری ایلگیلندیردیغی اوچون منی ده بو قونودا بیرنئچه مسئله یه آچیقلیق گئتیرمه یه مجبور ائتدی!

منیم بیلدیغیم و اینادیغیم دوشونجه ده ، بیراولکه نین اونجو و آیدینی ، و اوزللیک ایله ایشغال، آسیمیلاسیون، خرافه و سومورو آلتیندا اولان میللتین ضیالیلاری چالیشمالیدیرلار ،میللتلرینی آیدینلاتاراق یانلیش بیلگی ، خرافه و آسیمیلاسیون سیاستلری کی اونلارا ایللر بویو دیکته اولونوب و یانلیشی دوغرو گوردوغو دوشونجه لری میللتین بینیندن سیلیب آزادلیق ، عیدالت و انسان حاقلری مفکوره سینی اونلارا وئره ره ک ، قورتولوش و قیام اوچون حاضیرلاسینلار، یوخسا اونلارین دوشوندوک لرینی دوغرو گوروب و خالقین ایستک لری دوغرولتوسوندا حرکت ائتسه لر، آیدین و اونجو یوخ ساده جه پوپولیست سیاست یوروتن و …سیاستچی اولورلار.

۱-عزیز دیره نیش کادرلاریندان اولان «مجید آراز» بئی «ملا حسنی» ، «قاضی پور» و رئژیم عسگرلرینه میللت!!! طرفیندن قهرمان عنوانی وئریلدیغی اوچون ؛اونلاردا عینی عنوان و القابی قولانمالارینی دوغری گوروب وسونرا سانکی تبریز و اردبیللی وگونئی آذربایجانین باشقا بولگه لرینده یاشایانلار بونو درک ائده بیلمزلر دیه بیر ایمادا بولوندی ! (خوشبختانه کاظیم بئی کی بو مفکوره یه تام قارشی دیر اوزو باتی آذربایجانین قوشا چای شهریندندی ، بو سوز و ادعانی مطلقا سوال آلتینا آلیر) حال بو کی بودوستوموز بیرتشکیلات منصوبی اولاراق بو خطایه دوشمه مه لیدیر. دوشمنین آماجی پهلوی ایله باشلایب و بو رئژیم ایله دوام ائتدیرن بیرسیاستی وار ایدی و او تبریزلی ایله اردبیلینی ، اورومیه ایله …. یعنی تورکلری بیربیرینه سالاراق بیرلیک و برابرلییمیزه ضرر وئرماق ایدی !

و بوگونه قده ر میللی حرکت ده ،باشاری ایله یوروتولن سیاست ایسه بو اویونو بوزماق و بیرلییمیزی ساغلاماق اولموشدور!
باتی آذربایجان ایله دوغونو سانکی ایلکه لر و دوشونجه لری فرقلی گوسترمک تاکتیک سل یوخ بلکه استراتژیک بیرخطا سایلیر!
۲- گونئی آذربایجان ، ایستر باتی آذربایجان ، ایستر دیگر بولگه لر یعنی اردبیل، زنگان ، قزوین ، قوم و…. ولایت لری نین آماجی و ایلکه لری عینی دیر و شهرلر و بولگه لریمیزی آیری آیری گوسترمک و بیربیرلرینین سانکی دردلری آیری و آنلاماقدا زورلوق چکدیک لری ، منجه حرکته و او حرکتی تمثیل ائدن تشکیلاتلاردان بیریسی اولان «دیره نیش»ه ضرر دن سونرا فایداسی اولماز!

۳- تورکمن صحرا ، احواز و … جنایتلرینی یارادان، یونه تن و اجرا ائده ن فارس ایرقچی ، سوزده ایسلامچی دوشونجه اولموش و اورایا گونده ریلن رئژیمین جنایتکار قوه لرینده ، بوتون ایران آدلانان میللت لر و او زینداندا یاشایان شخصلر ایشتراک ائتمیش و بونو بیر میللی حرکتین فعالی وسیاسی تشکیلاتینا منصوب اولان شخص، ساده جه تبریزلیلر اولاراق گوسترمه سی نه تاریخی آچیدان گئرچک لیک پایی وار ونه تورکمن سوی داشلار و عرب قارداشلاریمیز ایله وئردیغیمیز مشترک ایرقچی-ایشغالچی رئژیم ایله مباریزه یه فایداسی اولور! بو سندسیز ادعا ساده جه ایرقچی فارسلارا وئریلن بیرآتو اولا بیلیر! امید ائدیرم بو ساده جه جانلی یاینین گئتیردیغی گئرگین لیک ایله دیله گئتیریلمیش بیر یانلیش سوزاولسون ، نه باخیش آچیسی.
۴- مجید بئی تورکییه دن مثال گه تیریب و کوردلرین سیلاحلی قوه لرینین ۱۰۰۰۰۰ نفره اولاشماسینی حقلی اولاراق خطر گورور اما بیر نئچه نقطه یه دیققت ائتمه میشلر:
آ) کورد لر ایللر بویو عراقین ؛ تورکییه نین، سورییه نین و ایران آدلانان زندانین ،اردولاریندا یوز مینلرجه عسگری و سوبایی وار ایدی آما اونلاری کوردوستان و میللتینین قورتاریجیسی اولاراق گورمه یب و اوز میللی سیلاحلی قووه لرین یاراتدیلار، عراق و سورییه ده، ده نگه لر دئیشیرکن اونلارین بیربولومو بو سیلاحلی قووه لره قاتیلدیلار!
ب) کورد لر هئچ بیرزامان دولته چالیشان سویداشلارین، اوزلریندن گورمه یب و امانسیز اونلاری ایله مجادیله ائدیبلر ، حتی اونلاری آشاغالماق اوچون «جاش» آدی تاخمیش و خطاب الیرلر! ( جذب و اونلارین ایچینده نقوذ ائتمک باشقا بیر موضوع دیر)
؛کوی قوروجولارین صرف تورک دولتی ایله بیرلیک ده حرکت ائتدیک لری اوچون اولدورور و تورک اوردوسو ایچینده کی کورد عسگرلرکی داعش ایله مبارزه ده جان وئریللر بئله شهید دئمه میر و دئمزده!

۵- میللی حرکت آدی و ماهییتیندن ده آنلاشیلیرکی ، صینیف سل ، دین سل و… بیر داوا دئیل و قورتولوش و اوز مقددراتینی اوز الینه آلانا قده ر بوتون طیف لری ایچینده باریندیران بیر حرکتدیر، طبیعی اولاراق رئژیمین بوتون اورگانلاریندا و اوزللیک ایله حربی قوه لرده وظیفه لی تورکلر، و ایرانچی تشکیلاتلاردا فعالیت ائدن هر بیر سوی داشیمیزی آسیمیلاسیون سیاستیندن قورتارماق و اونلاری میللی مفکوره ایله تانیشدیریب و حرکته جذب ائتمک مجادیله میزین واز کئچیلمز ایلکه سیدیر ، اما رئژیم و ایرانچی تشکیلاتلاردا ایرقچی سیاسته قوللوق ائدن و وطن و میللتینه خیانت ائدن مانقورت لاری اوزوموزدن گورمک یانلیش و چئلیشکیلی بیر سیاست دیر.
امید ائدیرم بو دوستوموز اوردو و سپاه ین ایچینده کی تورک لری میللی حرکته قازاندیرماق ایله اونلارین جنایت لرینی و ایرقچیلیغین عمرونون اوزاماسینداکی مخرب نقش لرینیین آراسینداکی فرقلیغا واقیف دیر.

سایقیلار ایله
آیدین مارالانلی

 

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture