/  
بیریمجی صحیفه » مقاله لر و باخیشلار » ایشچی گونو موناسبتی ایله یوروش مهرعلی بیگلی نین ساوی

ایشچی گونو موناسبتی ایله یوروش مهرعلی بیگلی نین ساوی

اوغوز تی وی:دونیالیق ایشچی گونو مناسبتی ایله دوشوندوکلریم دونیالیق ایشچی لر گونو, امک صاحب لرینین سومورگه چی لره و استثمارچی لارا قارشی مبارزه لرینی آندیران بیر گوندور. بو گون دونیادا ایشچی لره وئریلن آوانتاژلار بو مبارزه نین سونوجودور. اوسته لیک بشریتین الده ائتدیی بوتون تمل حاق و آزادلیق لاردا مبارزه نتیجه سینده الده اولونوب. یاشادیغیمیز اولکه ده, اوزون ایللر بویو هم ایشچی لرین حاقلاری, همده باشقا آزادلیق لار اوغروندا مبارزه لر اولسادا, هله ده وار مبارزه گرکدیرن بویوک سورونلارلا قارشی قارشی یاییق, آنجاق تکجه مبارزه دئییل,بو مساله لرین بیربیریله مناسبتینه نئجه باخیلماسی دا نتیجه ده ائتکی لی دیر. قاپساییجی بیر باخیش اولمایینجا نتیجه یه اومود بسله مک اولماز. بو سورونلار(مساله لر) بیر بیرینه دولاشمیش مساله لردیر و هامیسی بیر بیرین ائتکی له مک ده دیر. اونا گوره ده تکجه بیرینی چوءزمه یه دوشونوب,باشقالارین گله جه یه ائرته له مک,بزی کئچمیش نسلین دوشدویو باتلاغا یئنی دن سالا بیلر. اوءرنک اوچون میللی مساله ده ان چوخ زیان چکن لر اقتصادی, تحصیل- اوءیره نیم, اجتماعی و پسیکولوژیک باخیمدان ایشچی لردیلر. اقتصادی آیری سئچکیلیک نتیجه سینده یارانان ایشسیزلیک, اوءنجه و داها چوخ ایشچیلری یاخالایار.اونلار ایش آزادلیغیندان یا آز پولا ایشله یر یاوا سرمایه نین یاراتدیغی ایش مرکزینه_ فارس بوءلگه لرینه کوءچمه یه مجبور قالارلار. غربت یاشامی هابئله اوءزگه لشمه یه گئری قالمانی جبران ائده جک مادی امکان اولمور و ان چوخ زیانی اونلارین اوشاقلاری چکیر. باشقا مساله لریمیزه باخیلدیقدا بو ایلگی و ائتکی له شیمی راحاتجا گوءرمک اولار. قادین لارین مساله سی, ایشچی لرین سورونلاری, دموکراسی, اجتماعی آزادلیق لار, میللی مساله و… هامیسی نین بیر بیرینه تاثیرین گوءرمک اولار. اونا گوءره ده بو مساله لرین هامیسینا بیر بوتون اولاراق دوشونمک و یول تاپماق گره کیر. بو مساله لری آییرماق آیریلیغا گتیریب چیخارار و اونلارا گوءز یومماق هامیسینین یئرده قالماسینا و یئنی مساله لرین دوغماسینا. بیز نه دموکراسی نی بوتون دردلرین درمانی بیلیریک نه ده میلت چیلیک آدینا دموکراسی دان گوءز یومماق اولار. نه قادین حقوقوندان میللت چیلیک آدینا کئچمک اولار, نه ده فئمینیسم آدینا میللی حقوقدان. مدرن آذربایجان ناسیونالیزمی بوتون بو سورونلاری بیر بوتون اولاراق گوءرن دوشونجه سیستمی دیر. بو دوشونجه ده ایندیکی بوتون مساله لریمیزی چوءزمک, هدف ساییلیر. هئچ بیرینه آراج (وسیله) و کوءرپو کیمی باخیلمیر. بو دوشونجه قوزئی آذربایجان دا ایلک جمهوریت 1918 + جی ایل ده ده میللی ایدولوژی سی اولموش و بیر حدده جن 1945_ جی ایلده گونئی آذربایجان دا کی میللی حکومت ده ده گوءزله نیلمیش دیر. معاصرلشمیش و گونوموزه اویغونلاشمیش بو دوشونجه بو گونده, سورونلاریمیزی چوءزه جک ان ده یرلی اولکوموز اولا بیلر. مدنی دیره نیشه ساریلان گنجلیییمیز, بو اولکویه (ایده آلا) دایاناراق, آذربایجان ایچینده کی بوتون اجتماعی_سیاسی حرکت لری بیرلشدیریب و بوءیوک اجتماعی گوج توپلایا بیلر. هابئله بونونلا یاناشی ایرانداکی بوتون اجتماعی_سیاسی و میللی حرکت لرله اوءز استقلالین و کیملییین قورویاراق, ایش بیرلییه کئچه بیلرده. بو توتوم, بیزیم دولاشیق سورونلاردان چیخیش یولوموزدور. بو یولدا هامینیزا اوغور دیله یه رک: ایشچی گونون ده یرلی امک چی لره( ایشچی لر,طب باجیلاری,پرستارلار, معلم لر, ائوده ایشله ین قادینلار و…) قوتلاییرام. بو گون هامینیزا موبارک اولسون. بیز هامیمیز ایشچی ییک, ایشچی لرین مساله سی بیزیم مساله میزدیر. گونئی آذربایجان سیاسی محبوسو یوروش مهرعلی بیگلی تبریز زندانی

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture