/  
بیریمجی صحیفه » مقاله لر و باخیشلار » بایرام قاباغی عنعنه لردن : چرشنبه بازاری

بایرام قاباغی عنعنه لردن : چرشنبه بازاری

اوغوز تی وی:گؤزل آذربايجانيميزدا بايرام آيي نين چرشنبه لري هر بؤلگه ده اؤزل شاد مراسم و عنعنه لرله قوتلانيرميش.
بايرام آيي’نين بو دؤرد چرشنبه سي بعضي يئرلرده بئله سیرالانماقدادیر :
1)سوچرشنبه سی
2)اود چرشنبه سی
3)یئل چرشنبه سی
4)توپراق چرشنبه سی
بير آيري بؤلگه لرده ده
1)خبر چرشنبه سی
2)گول چرشنبه سی
3)كوله چرشنبه سی
4)آخير چرشنبه سی اولاراق بيلينير

اوچونجو هفته «یئل» یولدان چاتیب آز زاماندا بوتون یئرلری دولانیب تورپاغی قیش یوخوسوندان آییتدیغی اوچون (یئل چرشنبه‌سی) آدلانیب.
اوچونجو چرشنبه‌یه کوله چرشنبه سي ده دئیرمیش‌لر؛ بئلنچی گونده عاییله‌نین بوتون اویه‌لری (عضولاری) ساچلارینی قیسسالدیب اؤزلرینه یئتیشرمیش‌لر. قیز گلین‌لر اؤزلرینی بزه‌ییب دوزه‌یرمیش‌لر؛ قاری ننه‌لر ایسه باشلارینا خینا (حنا) قویارمیش‌لار. یومنو خوش اولار دئیه ایناملارینا گؤره اینک‌لرین و يا تويوخ خوروزون قویروقلارین دا بیله قیسسالدارمیش‌لار.مال لارين اوستونه گئجه قوورقا سپرديلر كي الله قوورقالارين ساييسي قدر اولارا مال-حيوان وئرسين.

چوخ كئچمیش زامانلاردان آزربایجان دا ایلین سون چرشنبه‌سی هامی بازار گئدیب عاییله عضولرینه چرشنبه‌لیك آلارلار. بوگون هر نه‌دن اؤنملی تازا پالتار آلماق‌دیر. هر كیمسه پولونا قدر عاییله‌سینه تازا سئودییی گئییملر آلار. بازارلار اولدوقجا قالابالیق اولار اوشاقلار اوچون پالتاردان باشقا اویونچاق، بعضی قادینلار دا قیزیل آلیب، چوخلاری ائو نسنه‌لری‌ده آلمیش اولارلار. بو گونون ان اؤنملی آلیناجاغی «چرشنبه یئمیشی» یا «یئددی لوین»‌دیر. قورو یئمیش، بادام، گیردكان، كیشمیش، نوخود
باسلیق، سوجوق و باشقا شب‌چره‌لردن بیر یئره توپلانمیشی چرشنبه یئمیشی آدلانیر.

اره گئدن قیزلارا پای آپاریلاندا چرشنبه یئمیشی ده پایین قیراغیندا قویولار. آذربایجانین بعضی كندلرینده چرشنبه یئمیشی اولمادان قووورقا قوورولوب ائوین آغ ساققالی الی ایله ائو آداملارینین آراسیندا پایلانار. «‌بعضی یئرلرده آخیرچرشنبه گونون یئمگی كوفته اولار، كوفته سایسی ائو آداملارنین سایسی جان اولدوغو حالدا بیردانادا آرتیق پیشیریلر كی اونادا «قئییب پایی»دئیلیر، بونو خبرسیزگلن قوناق اوچون پیشیریلر. چرشنبه گونو بیرچوخ یئرده قووورقادا قوورولار، بو قووورقا ائوین آغ ساققالی طرفیندن ائوآداملارنین آراسیندا پایلانار. بعضی كندلرده بوایش داملاردا و اود تونقالارنین باشیندا گورولر، آغ ساققال كیشی بیر شیش ایله دامین دورد طرفینه بیر جیزیق چكیب قاوورقادان دایره ایچرسینه سپپب سونرا خیر دوعاسی وئرر (بسم آلله الرحمن الرحیم، الهم صلی علی محمد وآل محمد، ائی آللاه انشااللاه، كی محمدین نوروزو، ابراهمین دوولتی، نوحون عومرونو، ساغلیق و بوللوقلا بیزلره و قونشولارمیزا اكرام ایله ، سونسوزلارا اوولاد،جوانلارا ساغلیق، قوجالارا اوزون عومور، ناخوشلار شفا، فاغیرلارا دوولت، پوللولارا كرامت عطا بویور، هامینی بیر بیرینه مهربان ائله، آمین یارب العالمین) دوعادان سونرا بیر اووج قاوورقا و نوخود و مرجی گوتوروب اوزو قیبله یه ساری دوروب نییت ائلیر، تانری هامیا شنلیك، بول روزی قیسمت ائله‌سین، آخیرده بیر اووج قوورقادان دا گویه سپللر و دئیر كی[بودا قوشلارین پایی.] »
بعضی یئرلرده بازاردان اویونچاق آلماق یئرینه، اوشاقلار پالچیقدان فیشقا ایله ماشین یا باشقا اوینادمالی دوزه‌لدیب؛ بایرام گونو یئتینجه اویونچاقلاری ایله اویناییب بویاقلی یومورتادا چاقیشدیرارلار. یازان: اسماعیل زاده

Comments,Baxışınız
oguz gif telegram