/  
بیریمجی صحیفه » مقاله لر و باخیشلار » تورک قادینلار، یئنی لییین و آزادلیغین بایراقچی لاری

تورک قادینلار، یئنی لییین و آزادلیغین بایراقچی لاری

اغوز تی‌وی:وار اولان سیاسی_توپلومسال سیستئمین چرچیوه سینده، قادین لارین رولو هر زامان گوجسوزلندیریلمه یه و حاشیه ده قالماغا چالیشیلیر.

یالنیز ائو قادینی یا ویترین قادینی یاراتماغا چالیشیلان زامان، آزربایجان میلی حرکتی تورک قادینینی، ابزاری اولاراق یوخ، بلکه بو وطنین و میلتین صاحیبی، فعال عضوو و تاثیرلی بیر فردی کیمی گؤروب و رسمیته تانیماغا چالیشیر. وار شرایط نه قدر قادینلاریمیزی، یاشامین جدی و اجتماعی ساحه لریندن چیخارتماغا چالیشسادا، قادینلار بؤیوک دیره نیش گؤستریب و یئنی مئیدانلاری فتح ائتمه یه چالیشماقدادیرلار. آرتیق اورتا چاغ ذهنیتی ایله، یئنی دونیا ذهنیتی مجادله حالیندادیرلار.

بشری تجروبه ایسه هر زامان یئنی لییین، اورتا چاغ ذهنیتینه غلبه چالماسینی گؤسترمیشدیر. آرتیق قادینلار اؤز چالیشیق و قابلیتلری ایله توپلومدا بؤیوک رول و مسؤلیت لر آلماغا چالیشیب، دانیلان و یوخ ساییلان حاقلارینی  تام سیویل و دینج یوللارلا الده ائتمه یه چالیشیرلار. بو یولدا آزربایجان میلی حرکتی، اینسانی، دئموکراتیک،میلی و اینسان حاقلارینین ساوینیجی سی و بایراقچیسی اولاراق یوردوموزدا قادینلارا بو اولاناق و مئیدانی داها گئنیش بیر حالتده یاراتماغا چالیشمالی دیر. قادینا باخیش و اونو ده یرلندیرمک، اینسانجیل بیر کاتاقوریده بیچیملنیرسه ، آزربایجان توپلومو چوخ بؤیوک قازانجلار الده ائدیب و یئنی بیر یاشام بیچبمینه آددیم باسا بیلر.

قادینی ائوده و یا ویترین لرده حبس ائتمه یه چالیشان ذهنیت، قادینی بیر نسنه کیمی گؤرمک ده دیر. بو باخیش ایسه هر نه دن اؤنجه غیر منطقی، غیر انسانی و بایات باخیش اولماقلا بیرگه یالنیز قادینی توکه دیجی (مصرف کننده) کیمی گؤرمک دیر. بو باخیشین سونوجو ایسه یاریمچیلیق گلیشمه و فلج بیر توپلوم یارانیب و آزادلیق ایله دئموکراسی نین یارانماسی ایمکانسیز قیلار . تورک قادینی عینی تورک بیی کیمی، بو وطنین صاحیبی دیر و آزربایجانین بو گونو و صاباحی اونودا ایلگیلندیره ر.

قادینلیغی بهانه ائدیب اونو اؤز طالعیینی تعیین ائتمکدن و یا اؤز ایدئال و ایستک لرینی اورتایا قویوب، مطالبه ائدیب و اونلارین اوغروندا مجادله ائتمک دن چکیندیرمک، وطنیمیزه ده، میلتیمیزه ده چوخ بؤیوک حاقسیزلیق و ظولمدور.

تام ترسینه حرکتیمیز و توپلوموموز کیشیسل لیک دن و ارکک اگمنلیییندن قورتولماق ایسته ییرسه، قادینلارا و اونلارین قابلیت لرینه و حضورلارینا داها اؤنم وئریب و قادینلارا قارشی دورماق یئرینه اونلارا آرخا چیخیب و اونلارا دستک اولمالی دیر. بیزیم توپلومدا قادینلارین ، یئنی لییین و داها گؤزل بیر یاشام و آزادلیغین بایراقچیسی و اؤنجولو اولدوغو آیدین و بللی بیر موضوعدور. بو گون بو فرصتی قادینلارا میلی حرکت بیر آن گئجیکمه دن سونمالی دیر.

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture