/  
بیریمجی صحیفه » مقاله لر و باخیشلار » توپلوم ،اؤنجوللر و ده ییشیمین ضرورتی.

توپلوم ،اؤنجوللر و ده ییشیمین ضرورتی.

  اوغوزتی وی :اینسان یالنیز، یاشادیغی توپلومون محصولو دئییل، یاشادیغی توپلوما جیدی ائتگی لر بوراخیب، اونا یئنی یؤن و یئنی یاشام کیفیتی ده سونان ائله اینسانین اؤزودور .



بئله بیر اینسانلارا اؤنجوللر دئییلیر. اؤنجوللر، اینسان اراده سینی توپلوما سونان و توپلوما یئنی بیر یول گؤستریمینده بولونان و بو یئنی لییین اوغروندا چالیشان شخصلردیرلر. اؤنجوللر وار اولان دوروما تابع اولماییب و وار شرایطی اؤز اراده لری اساسیندا شکیللندیریب و بایاغی بیر یاشام و دوشونجه طرزیندن اوزاق ،توپلوما بام_باشقا بیر یاشام و گلیشمه سئچه نکلری سونماقدادیرلار. بو اؤزه للیکلری اؤنجوللرین دورومونو توپلومدا فرقلی لندیرسه ده، عینی حالدا اؤنجوللری توپلومدا یالنیزلاشدیرا دا بیلر. یالنیزلیق ایسه اؤنجوللرین تأثیر دایره و ائتگیلرینی آزالدیب و دارالدا دا بیلر. بیر توپلومون ده ییشمه و گلیشمه سینین کیفیتی او توپلومون اؤنجوللرینین کیفیتیندن آسیلی اولسادا، اونون ده ییشمه و گلیشمه سینین کمیتی توپلوم و اؤنجوللرین قارشیلیقلی ایلیشگی سیندن آسیلی دیر.
ائله بونا گؤره ده اؤنجوللر توپلومون ایستک و دورومونو درک ائدیب و گؤرمه لی دیرلر، توپلوم ایسه اؤنجوللرین دوشونجه لرینه آچیق اولوب و فعالیت لرینه ده یر وئریب و اؤز اؤنجوللرینه صاحیب چیخمالی دیر.

نه قدر توپلوم و اؤنجوللر بیر_بیری ایله اولوملو و ائتکیلی بیر ایلیشکی ده اولسالار و اؤنجول_توپلوم فاصله سی آزالسا او قدر او میلت گوجلو و جانلی بیر میلته چئوریله بیله جکدیر. چونکی بوتون قالارغی ده ییشیملر و گلیشمه لر، توپلوملا اؤنجولون بیرگه حرکتیندن یارانان بیر گئرچکدیر. بونو گورمزدن گلیب توپلوملا اؤنجولون آراسیندا یارادیلان بوتون فاصله لر و آیریلیق لار، بیر میلتی هم جهت سیز، همده قرارسیز قویا بیلر. بئله بیر میلت یا باشقالارینا تابع و تسلیم اولار یا دا اؤز کؤکونه اویغون گلیشمک و ده ییشمک گوج و ایسته یینی ایتیره بیلر.

آیدینلیق

 

Comments,Baxışınız
oguz gif telegram