/  
بیریمجی صحیفه » مقاله لر و باخیشلار » تکاموله نئجه یئتیشیلیر؟.

تکاموله نئجه یئتیشیلیر؟.

اوغوز تی وی:تکاموله یئتیشمک بیر تاریخی گلیشیم دیر. بو بیلیمین (علمین) و وارلیغین بوتون ساحه لری اوچون کئچه ر حتا فردین بیولوژیسی نین تکامولونده ده رول اویناییر.Evulitionیعنی تکاموللشمه.ساده بیر میثال، یئنی دوغولموش اوشاق بیر گونده و بیر هفته نین ایچینده دیل آچیب ۱۸ یاشینا اولاشمیر. او بو ۱۸ ایل زامانی کئچیرمه سی لازیمدیر. علمی آراشدیرمالاردادا بویوک علمی نائلیت لری الده ائتمک اوچونده آدیم ـ آدیم ایره لی گئدیلیر. بیلیم ساحه لرینده اولدوغو کیمی ایقتیصادی نائلییت ده ایلک اولاراق کیچیکده ن باشلانیر. گئت ـ کئده بویویوب گه لیشیر. بو ایجتماعی ، سیاسی ساحه لر اوچونده کئچه رلیدیر. بو او دئمکدیرکی ایجتماعی ـ سیاسی گلیشمه لر اوچون زامان لازیمدیر. اینقلاب یولو ایله بو زامانی دولدورماق ایمکانسیزدیر. بو ایشده توپلومون میللی خصوصیتلری و آلیشقانلیقلاری بویوک رول اویناییر. ایقتیصادی و ایجتماعی و تئکنیک باخیمیندان گلیشمیش غرب اولکه لری نین بو شکیلده گلیشمه لری بویوک بیر زامان آپارسادا میللت لرین میللی خصوصییتلریده بو ایشده بویوک رول اویناماقدادیر. بونو اونلارین آتا سوزلرینده ده گورمک مومکوندور.

میثال اوچون آلمان میللتینده اولان آردیجیلیق ، گورولن ایشه اینام ، دقیق لیک بو اولکه نین گلیشمه سینه ، دونیادا اوزنه خاص یئر قازانماسینا سبب اولموشدور. بو میللتین تاریخینه باخیلدیقدا آراشدیرما ، سبب آختارما، هر کیچیک بیر شئی یین کاغاز اوستونه گتیریلمه سی یوز ایللردن به ری بو میللتین کاراکتئریستیک خصوصییتی دیر.بو میللتین عالیملری۱۵ ـ۱۶- ۱۷ نجی ایللرده آسیا ، آفریقا و آمئیرکادا ان دقیق آراشدیرما آپاران شخصیلر اولموشلار. اینسانلارین ، حئیوانلارین و بیتکی لرین حاقیندا اولان آراشدیرمالاری بوگونده بو علملرین پایاسینی تشکیل ائدیر. بو علمین بوتون ساحه لری اوچونده کئچه رلیدیر. هر آراشدیریجی اوزونده ن قاباقکی آراشدیریجی نی یولونو تعقیب ائنمیشدیر. اونو تکمیللشدیرمیشدیر. یعنی منجیلیک له حرکت ائدیلمه میشدیر. بوگونکو آلمان صنایعینه باخیلدیقدادا بونو اورادا گورمک اولار. فایتونون مئرسیدئسه چئوریلمه سی چئشیدلی عالیم و صنایع تحقیقانچیلارین امه یی نین نتیجه سیدیر. یعنی ان کیچیک بیر ال صنایعی زامانلا تکاموللشدیریلیب صنایعه چئوریلمیشدیر. یعنی هر نسل اوز آتا ـ باباسی نین قویدوغونو تعقیب ائدیب ، تکاموله گوتورمه یه چالیشمیش دیر. حتا کیچیک ال صنایعی بیزده اولان کیمی یوخ ائدیلمه میش ، عکسینه قورونوب ساخلانیلمیشدیر.هر نسل اوز تجروبه سینی کاغاز اوستونه یازیب اوزونده ن یادگار قویموشدور. هئچ بیر شئی یوخ ائدیلمه میشدیر. بئله لیکله آلمان فابریک لرینین تاریخچه سی ۲۰۰ ایلده ن چوخدور.

بو مدت ایچینده هر قورشاق اونو تکاموله گوتورمه یی اوزونون وظیفه سی کیی گورموش بو اولوشوم بوگونده ده وام ائتمکده دیر. خاطیرلاتماق یئرینده دیرکی ، بو آراشدیرما نین پایا مکتبده قویولور ، هر ایل مکتبلی لرین یوزلدیب ، یارادیقلاری ، تحقیلری نین نتیجه سی یاریش شکلینده ده یه رلندیریلیب ، موکافاتلاندیلیر.
بو اولکه ده کئچه ن مین ایلده شاهلارین و حوکومتلرین تیکدیکلری بینالار، سرایلار حتا اونلارا عایید باسیریقلار(قبرلر) بوتون ساواشلارا باخمییاراق بوگونده اولدوغو کیمی دورور. ائله بودا قئید ائدیله ن میللی خصوصییتین بیر پارچاسیدیر.
بو قیسا باخیشدان سونرا بیزیم توپلوما گلدیکده تمامن آیری خصوصیتلرله قارشی ـ قارشییاییق. هر شئیی یوخ ائتمک ، اونا ده یه ر وئرمه مک ؛ حوصله سیزلیک ، لاقئیدلیک ، خصوصیله فردیجیلیک ، منجیللیک کیمی خصییتلرینه راسلاییریق. ائله شاهلاریمیزدا اوزلرینده ن قاباقکیلارین اثرلرینی ، اونلارین تیکدیکلرینی سرایلارین حتا قبرلرینی یوخ ائتمه لرینی گوروروک. حتا هئچ بیر دوره نین یارادیجیلاری ال صنعت چیلری اوز تجروبه لرینی کاغاز اوسته گتیرمه میشلر. اوز تجروبه لرینی اوزلریله باسیریقلارینا آپارمیشلار.
بیزیم اولکه ده عمومییتله شرقیده حوصله سیزلیک ، گورولن ایشی جیدییه آلماماق ، گلیشمه نین قارشی سینی آلمیشدیر. گورولن ایشین دالینجا آردجیلیقلا گئدیلمه میشدیر. چونکو بیلیمین و صنایعین گلیشمه سی نین قارانتیسی آردجیلیق دیر. بیری او بیری نین باشلاتدیغی ایشی ده وام ائتدیریب تکامولونه چاتدیرماقدیر. گلیشمه نین قاباغینی آلان بیر عامیلده من جیلیک دیر. منه گوره من جیلیک میللتیمیزین ان چیرکین آزارلیقلاریندان دیر.
بو اوزونو ایجتماعی مسئله لرده ده گوسترمکده دیر. بیرلیکده ایش گورمکده ن قاچینماقدیر ، بیر ـ بیرینی گورولن ایشه خاطیر تحمول ائده بیلمه مکدیر. ایش دوزه نین(پیلان ـ برنامه) اولماماسی ، ایش دوزه نی چرچیوه سینده ایشله مه یی قبول ائتمه مکدیر.

 

ساده بیر میثال، بیر آلمانلی نین حیاتیندا هر شئی قاباقجادان پیلانلاشدیریر. حتا شخصی حیاتیندادا بیر ـ ایکی ایلین ایش دوزه نی(برنامه سی) و هفته ایچینده نه ائده جه ییده بللی دیر. حتا بونلار چوخ واخت کاغاز اوستونده قئید ائدیلیر
بیزه گلدیکده سوروشارسان کی بوگون آخشام نه ییه جه ییک ؟ جاواب الله قادیردیر بیر شئی تاپیب ییه ریک جاوابینی آلیرسان. بیز شرقیلی لرین باشقا خصوصیتلریمیزده ن بیریده دویقو سالیقدیر. هر ایشیمیز احساسات اوزه رینده دیر. دوشونوب ـ داشینیب بیر ایشه ال آتماماقدیر. ائله بونا گوره ده بیز شرقیلیلرین گوزونده آلمان میللتی قورو میللت دیر. احساسیز میللت دیر.

بونلاری سایماقدان مقصد اوزوموزو تانیماق، بویودوجو( زره بین) آلتینا قویوب باخماقدیر. ضعف طرفلریمیزی بیلمکدیر. بو ضعف لری یوخ ائتمه یه چالیشماقدیر. بو دونیادا بیر اینسان کیمی یاشاماق ایسته ییرسک اوزوموزو چاغداش دونیادا آپارماغی باجارماقدیر. تکامول یولو سئچمکدیر.

بوگونکو سیاسی موباریزه میزده ده بو منفی طرفلری کنارا قویماق ، پیلانلی چالیشماق، باشلاتیلان ایشی سونونا چاتدیرماق ، شخصی دویغولاریمیزی عمومی ایش اوچون قوربان وئرمه یی باجارماقدیر. هرده م بیر فیکره دوشوب ، اوزون بیر مدت گوردویوموز ایشی نتیجه یه وارمادان بوراخیب، یئنی سینی باشلاماقدیر.
سیاسی موجادیله باشقا مسلک لردن داها چوخ صبیر و آردجیلیق طلب ائدیر.ایجتماعی اولوشوملار (پروچئس لر) بیردن اولاجاق ایش دئییلدیر. توپلومون منیمسه مه سی ، اونون یولوندا فداکارلیق آپارماسی اوزو بیر تکاموللشمه دوورو ساسسلا بیله ر. بو فردی ایستکله بیرگونده اولان ایش دئییلدیر. سیاستله مشغول اولان بیریسی یورولمامالیدیر. بو یولدا بوتون یئنیلگی لره (شکست لره)راغمن ایناملا چالیشمالیدیر. هدفی اونودمامالیدیر. هدف اوزو اینام و گوج قایناغی دیر.

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture