/  
بیریمجی صحیفه » مقاله لر و باخیشلار » مشروطه انقلابي دؤرو ادبياتيميزين مقدراتي/ پروفسور محمد تقی زهتابی

مشروطه انقلابي دؤرو ادبياتيميزين مقدراتي/ پروفسور محمد تقی زهتابی

اوغوز تی وی: مشروطه انقلابي دؤرو ادبياتيميزين مقدراتي / پروفسور محمد تقی زهتابی

مشروطه انقلابي دؤرو، ملتلرين ملي شعورو اويا نير، ملي حسلر، روشنفكرلر و حاكم دايره لرين، فئوداليزم دؤرونده‌كي، محدود چرچيوه‌سيني يا راراق گئنيش خلق كتله‌لري داخلينده نفوذ ائدير، بوتون خلق، حتي ان گئج حركته گلن كندلي كتله‌لري سياست ميدانينا چكيليرلر. خلق اراده‌سي فردي اراده‌نين يئريني توتور، استبداد ويرانه‌لري اوزرينده محتشم دموكراسي سارايي باش قالديرير.

بو دؤرده اجتماعي- فلسفي فكر، ائله جه‌ده ادبيات سارايلاردان اوز چئويريب گئنيش خلق مالي اولور. خلقه دانيشماق مجبور يتينده اولان ادبيات مضمون ديل و موضوع جهتدن كؤكلوشكيلده دگيشير، گونلوك حيات مسئله لريني عكس ائدير، ديلي ساده له شيب خلق ديلينه ياخينلاشير، معارفچيليك عمومي جريان شكلي آلير.

بوتون بونلار، مشروطه انقلابلارينا خاص دير. بونا گؤره‌ده بوانقلابي كئچيردن هر بير ملتين ادبياتي تاريخينده اونون فكري حاضرليق دؤرو، جرياني و چيچكلنمه مرحله‌سي همان ملتين اجتماعي فكري و ادبياتي نين قيزيل دؤرلر يندن بيري اولور. بوفكري عياني لمس ائتمك اوچون بعضي ملتلرين ادبيات تاريخينه اؤته‌ري بير نظر سالماق مجبوريتينده‌ييك.

بؤيوك فرانسه انقلابيندان اول و سونراكي دورلر، يعني ۱۸- نجي عصرين ايكينجي ياريسي و ۱۹- نجو عصر فرانسه اجتماعي فكري و ادبياتي‌نين ان پارلاق دؤرلريندن بيري‌دير. ولتر، مونتسكيو، ديدرو، بوفون، ژان ژاك روسو… كيمي نهنگ متفكر لروسونرالار ويكتور هوگو، بالزاك، فلوبرت، تئوفيل گويته، لامارتين، شاتوبريان… و اونلارجا، اديب و شاعر همين دؤرلري يئتيشديرمه لري ديرلر. ۱۹۰۵ – نجي ايل روس انقلابيندان اول و سونرا، يعني ۱۹- نجو عصر و ايگيرمينجي عصرين اوللري، روس اجتماعي فكري و ادبياتي، اووقته قدر سابقه سي اولمايان شكيلده انكشاف ائتميشدير، چرنيشفسكي، دوبرولوبوف، بلينسكي، سالتيكوف، شچدرين، پلخانف، كيمي متفكر لر، قانچاروف، پوشكين، لرمونتو، گوگول، نكراسوف، گريبايدوف. داستايفسكي، تولستوي، چخوف، تورگنف… كيمي جهان شمول شاعروناثرلر همين بو دؤرلرده ياشاييب ياراتميشلار. اوكراين، گرجي و ارمني ادبياتلاري دا همين ايللرده سابقه سيز چيچكلمه دؤرو كئچير ميشلر.

ياخين و اورتاشرق خلقلري ادبياتيندادا عين وضعيت حكم سورموشدور ۱۹ نجوعصرين ايكينجي يا ريسيندان بري تورك ادبياتي اؤزونون ان پارلاق و زنگين دؤرلريندن بيريني ياشاميش و ياشاماقدا دير. نامق كمال، توفيق فكرت، يحيي كمال، محمد عاكف… كيمي گؤركملي شاعرلر بو دؤرلرده تورك ادبياتي نين گوي لرينده پارلاميشلار.

عرب ادبياتي همين دؤرلرده داها زنگين و رنگارنگ دير. اون دوقوزونجو عصرين سونلاريندا مصرده باش وئرميش عرابي پاشا عصياني بوتون عرب خلقيني سيلكه‌له‌دي. احمد شوقي، حافظ ابراهيم، خليل مطران، عائشه تيموريه، مي‌زياده الزهاوي، معروف الرصافي، محمود تيمور، ابوالقاسم الشابي، جبران خليل جبران، ايليا ابوماضي، الشاعر القروي، الياش فرحات، ميخائيل نعبمه، منفلوطي، بدر شاكرالسياب، نجيب محفوظ، محمد مهدي الجواهري، محمد الفيتوري و اونلارجا بؤيوك شاعر و يازيچي همين بو دؤرده عرب ادبياتيني زنگينلشدير ميشلر.

وطنيميزده ۱۹۰۶ نجي ايل مشروطه‌ حركتي ايله باشلانميشدير. معين سببلره گوره ايران ملتلريندن فارسلارو آذربايجانليلارين بو انقلابي كئچيرمگه داهاچوخ حاضرليغي وارايدي. بونا گؤرده‌ده بوانقلابين فكري اساسلاريني حاضر لايانلار اساسا بوايكي خلق داخليندن ميدانا گلميشلر. ميرزه فتحعلي آخوند زاده، ميرزه ملكم خان، زين العابدين مراغه‌لي، خبير الممالك، عبد الرحيم طالب‌زاده تبريزي، روحي، ملك المتكلمين، بوشخصيتلردن ايديلر.

مشروطه انقلابي‌نين حاضرليق دؤرو فارس و آذربايجان ادبياتلاريندا دؤنوش دؤرو، چيچكنمه مرحله‌سي، خلقي ليگين درين كؤك آتماسي دؤرودور. اديب پيشاوري، اديب الممالك، جهانگير صوراسرافيل، علي اكبر دهخدا، ايرج ميرزه، عارف قزويني، عشقي، بهار فارس ادبياتيندا، آخوندزاده، سيد عظيم شيرواني، محمد باقر خلخالي، نجف بيگ وزيروف، ميرزا مهدي شكوهي، صابر، ميرزا جليل محمد قلي‌زاده، راجي، صراف، هيدجي… آذربايجان ادبياتيندا همين بو دؤرون قلم استادلاري اولموشلار.

مشروطه انقلابيندان سونرا بوتون ايران خلقلري نين ادبياتي، اوجمله‌دن فارس و آذربايجان ادبياتلاري داها آرتيق چيچكله‌نيب انكشاف ائتمه لي ايدي. اما ايران آذربايجاني ادبياتيندا بوترقيني مشاهده ائتميريك، باشقاسؤزله دئسك، يوخاريداكي نمونه لرده گؤردوگوموزكيمي، مختلف خلقلرين ادبياتي، بورژوا انقلابلاريندان سونرا قانادلانير، انقلابدان اول باشلانميش ادبي جانلانما، انقلابدان سونرا چيچكله‌نير، داهاگؤزه‌ل ثمره‌لروئرير. حالبوكي، ايران آذربايجانيندا بونون عكسي مشاهده اولور، مشروطه انقلابيندان سونرا آذربايجان ادبياتي سولور، سوسور، طبيعي انكشافيندان قالير، اكيلميش تخملا لازمي و طبيعي ثمره لريني وئرمير. نه اوچون بئله اولور؟ اونا گؤره‌كي، غلبه چالميش مشروطه انقلابي‌، معين داخلي و خارجي علتلره گؤره ارتجاع طرفينده‌ن بوغولور، دموكراسي و خلقلرين برابرليگي عوضينه استبداد و شوونيزم حكم سورمگه باشلايير. فارس شوونيزمي انقلابين بوتون ملي ثمره لريني اؤزونه مخصوص ائدير، فارسلاشديرما سياستي يورودور، و آذربايجان ديلي، ادبياتي و مدنيتيني فشار آلتينا قويوب محو ائتمك ايستير، انقلابدان اول آذربايجاندا باشلانميش ادبي نهضت‌دايانديريلير. لاكن بوفشاررا باخميياراق انقلابين يارا تديغي ادبي انكشاف زمينه سي بيردن- بيره آرادان گئتمز و اكديگي تخملار جوجره بيملزدي. مشروطه حركتي نين ياراتديغي ملي انتباه دالغاسي بوتون ايران توركلري، داخلينده، ملي‌حسه مالك بيرجوان ادبي نسل‌ ياراتميشدي. بوجوان ادبي نسل، مركزي حكومت طرفيندن حمايت اولماسادا، دولت طرفيندن فشارا معروض قالسادا سس سيز شكيلده جوجه ريب علم عالمينه معلوم اولمايان فيدانلار[۱] شكلينده بوي آتمالي‌ايدي. بوفيدانلارين ان گؤركملي سي و ان عنادليسي شبسترلي ميرزه علي معجزايدي. اما مشروطه انقلابي‌نين يئتيرديگي ادبي نسل معجز له محدودلاشماز. بوادبي شخصيلتردن، ايرانين هر يئرينده ياييلميش آذربايجان توركلري داخلينده اولموش، سس سيز يا زيب‌يارا تميش واثرلريني ال يازماسي شكلينده اوزخانواده لرينده يادگار قويموشلار.

دموكراتيك مشروطه انقلابي بوغولدوسادا، ايران خلقي دموكراتيك فكرلردن و محروم ايران ملتلري ملي حقوق اله گتيرمك فكريندن گؤز يومماديلار. بوفكرلر داها دوغروسو دموكراتيك انقلابي تماملاماق فكري اونونلا برابر مشروطه‌نين بئجرديگي ادبي نسل، كول آلتيندا كؤزلركيمي ياشادي و زمان كئچيب اجتماعي فرصت اله دوشدوكجه كؤزه‌ريب پارلادي و ادبي كؤزلري قوتلنديريب سؤنمه‌سينه مانع اولدو. ۱۲۹۹ و ۱۳۲۴ نجو ايللر حركاتي ادبياتيميزا تازا تكانلار وئردي، اونو يئني گنج قلملرله غدالانديردي، گئنيشلنديريب درينلشديردي. بوفرصتلر قيسا و اوته‌ري اولسادا، ادبياتيميزدا تاثيري چوخ بؤيوك اولموشدور.

دئمك مشروطه انقلابيندان بوطرفه، قيسا مدتلي فاصله لر نظره آلينمازسا، ادبياتيميزفشار آلتيندا اولموش و يا زيچيلاريميزين اثرلري، اساس گون اوزونه حسرت قالميش و ال يا زماسي شكلينده، عائله‌لرداخلينده ساخلانيلما قداير. دان اولدوزو مجموعه‌ سي‌نين اونلارجا ايتگين زنجان شاعرلريني تانيتماسي و سون آيلاردا دگرلي وارليق مجله سي‌نين ساوا اطرافي شاعرلريني، بير سير اوخوجولار تقديم ائتمه‌سي بوفكريميزي آيدين ثبوت ائدير. يوخاريدا گؤسترديگيميز اجتماعي حقيقتلره اساسا بيزبوفكروه ييك‌كي، آذربايجانين بوتون يئرلري، ايرانين بوتون ترك‌نشين منطقه‌لري، ائله‌جه‌ده قشقائيلر داخلينده اونلارجا شاعر و يا زيچيميزين اثرلري ايتگين حالدا قالماقدادير.

بونلاري آراييب آختارماق ملي وظيفه‌دير. بوناگؤره‌ده دان اولدوزو و وارليق مجله‌سي نين بوساحه‌ده كي تشبث لريني اوره‌كدن آلقيشلاييب اونلارا يئني- يئني ادبي شخصيلتريميزي تانيتما قدا موفقيتلر ديله‌يه‌رك، بئله ايتگين اديبلريميزين بيريني حورمتلي اوخوجولارا تانيتماق ايستيريك.

 ماكي‌لي علي

ماكيلي جوان معلم دوستلاريمين بيريله صحبت ائتديكده‌او، سؤز آراسي مرحوم دايي‌سي اديب علي ماكيلي دان آدچكدي. هميشه ايتگين ادبي شخصيتلريميز و اونلارين اثرلري فكرينده اولدوغومدان، بواديبين اثرلريله ماراقلانديم.

مرحومون بير ال‌يازماسي دوستومدا وارايميش. تانيش اولماق اوچون اونو دوستومدان خواهش ائتديم. ال يا زماسي دؤرد پرده‌ليك بيرتر اژدي / فاجعه/ ايدي. اثرين ديلي بيشگين، اجتماعي فكرلري دقته لايق و خلقيميزين كند حياتينا عايد ايدي. بونا گؤره‌ده اديبين حاياتي و اثرلري حقينده لازمي معلومات الده‌ائتمك اوچون ماكيياگئديب مرحوم اديبين ياخين قوهوملاري ايله مصاحبه لردن اونون حياتي و اثرلري باره ده آشاغيداكي معلوماتي الده‌ائده بيلديم. بومعلومات هئچ بيريازيلي سنده اساسلانمير، بونا گؤره‌ده‌اونلاردا نقصلانلار و يانليشليقلار اولابيلر. اگر بئله خطالار وارسا، اميدواريق كي، مرحوم اديبين تهراندا ياشايان قيزي پروين خانم و اوغلانلاري محمد ماكوئي و جواد ماكوئي و هابئله فرانسه ده ياشايان اوغلو ابراهيم ماكوئي بونلاري آرادان قالديرسينلار.

 ماكيلي علي‌نين حياتي و اثرلري

ماكي محالي‌نين چوخ يئرينده شوكورزاده آديله مشهور اولموش علي ماكيلي مشروطه انقلابي‌نين يئتيرديگي، خياباني قيامي و ۲۱ آذر نهضتي دؤرونده آذربايجانين گؤزو آچيق و ملي حسلره مالك منورلريندن بيري ايدي.

ماكيلي علي ۱۲۷۵ نجي ايلده، ماكي شهرينده، تاجرحاجي حسينين عايله سينده آنادان اولوب، هامان شهرين قديم مكتبلرينده يا زيب اوخوماغي اؤيره نميشدير.

آتاايشي اولان تجارتله مشغول اولدوغوندان، ماكيلي علي اوللرتفليس، باكي، ايروان، ارضروم و استانبول شهرلرينه دونه- دونه سفرلر ائديب او يئرلرين مدني حياتيله ياخيندان تانيش اولموش و اكتوبر انقلابيندان سونرا ارضروم، آنكارا و استانبول آراسيندا تجارت ائديب بوشهرلرين مدني حياتي و تورك ادبياتي ايله باغلي اولموشدور. اديبين اليميزده اولان يگانه شكيلي ده استانبولدا چكيلميشدير. اوزون ايللر سوره‌ن بوسفرلري زماني علي ماكيلي آذربايجان، تورك و فارس ادبياتلاري، آذريايجان و فارس ادبياتلاري واسطه سيله روس ادبياتيله تانيش اولموشدور. آذريايجان و تورك ادبياتلاريله تانيشليق علي ماكيلي‌دا آناديلي و ادبياتينا  آلوولوبير هوس و محبت ياراتميشدي. بونا گؤره‌ده اديب ۲۱ آذر جريانيندا فعال اشتراك ائتميش و اوندان سونرا ايكي ايل ملايره تبعيد اولموشدور. تبعيددن قاييدان اديب نئچه ايل ماكي‌دا گؤز آلتي حيات سورموشدور. داها سونرا، پامبيقچي‌ليق ايشينده ماهر اولان اديب، پامبيق اداره سينده استخدام اولوب ايل ياريم اورادا ايشله‌ديكدن سونرا، اداره‌نين ياراماز ايشلرينه دؤزه‌بيلمه يره‌ك، استعفاء وئرميش و پره‌خوديك كندينده‌كي ملكلرينده يا چاليشاراق يايلاري كندده، قيشلاري ماكي‌دا ياشاميش و همين ايللرده فاجعه‌لي ازدواج اثريني قلمه آلميشدير. علي ماكي‌لي ياشجابويوك اولماسينا باخميياراق ايشلك، زحمت سئوه‌ر بيرشخص ايميش. ۱۳۴۷ نجي ايلده اوز باغيندا ايشلركن آغاجدان ييخيليب برك يارالانان اديبي معالجه اوچون تهرانا آپارميشلار. لاكن معالجه نتيجه وئرمه‌ميش و اديب همان ايل ۷۲ ياشيندا تهراندا وفات ائتميش و قم شهرينده با سديريلميشدير.

اديبين پروين آدلي بيرقيزي، محمد، جواد، و ابراهيم آدلي اوچ اوغلو اولموشدور. بونلاردان ابراهيم فرانسه ده و قالانلاري تهراندا ياشاييرلار.

ماكيلي علي‌نين فاجعه‌لي ازدواج عنوانلي دؤرد پرده‌ليك اثريندن علاوه منيم مصيبتلريم آدلي اثري ده معلومدوركي، ال يا زماسي شكلينده مرحومون اوشاقلاريندا ساخلانيلما قدادير. بونلاردان علاوه مرحومون آيري اثرلري نين ده اولماسي احتمالي‌وار. اميدواريق كي، اديبين قيزي، اوغلانلاري، قوهوملاري، دوست و آشنالاري‌نين همتي ايله بواثر لرده ميدانا چيخيب، ادبيات گلشنيميزي بزه يه جكلر.

 

فاجعه‌لي ازدواج  و يا دوشونولمه ميش وصلت

دؤرد پرده‌ليك فاجعه‌لي ازدواج اثري ماكيلي علي‌نين فعلا اليميزده اولان يگانه اثري‌دير. اوتوزونجو ايللرده قلمه آلينميش بو اثر، درام صنعتي باخيميندان دقته لايق و اجتماعي مضمون جهتدن دولغون دور. اثرين قيسا جادا اولسا، مضمونونو نقل ائتمكله يازيميزين حجميني شيشيرتمك ايسته‌ميريك. اونونلا تانيش اولماغي حورمتلي اوخوجولارين عهده سينه قوياراق اثرين بعضي جهتلريندن دانيشماق ايسته‌ييريك.

اثري ال يا زمادان كؤچوره‌ ركن، اونو، يازي قايدالاري جهتده‌ن اوخونا قلي شكله سالماغاچاليشديق. باشقاسؤزله دئسك، ديليميزين سسلي‌لريني، يازيلما ميش يئرلرده علاوه ائتديك.

ال يازيسيندا درام اثرلرينه خاص اولان اسلوب رعايت اولونما ميشدي. يعني مولفين اؤز سؤزلريله اوبرازلارين / قهرمانلارين/ سؤزلري بيري- بيريندن آيريلما ميشدي. دراماتيك اثرلرين يا زيلما قايدالارينا موافق اولاراق مولفين اؤز سؤزلريني ايكي خط/ …/ آراسينا سالديق.

ال يا زماني كؤچورمكده امانتي تام حفظ ائتمك اوچون، بعضي كلمه لره وئريمليش ايضاحلاري، اثرده اولدوغوكيمي، صفحه‌لرين آشاغي‌سيندا عكس ائتديرديك. بو كلمه‌لرين بعضي‌سي ماكي لهجه سينه خاص دير. ادبي ديليميزي گؤ‌زه‌ل بيلن اديب بوكلمه‌لري بيله- بيله ايشله ديب معنا لاريني ايضاح ائتميشدير.

بيلديگيميزكيمي هر بير شاعر و اديبين وظيفه‌لريندن بيري ده خلق ديلينده اولان گؤ‌زه‌ل و اصيل كلمه‌لري تاپيب ادبي ديلده ايشلتمدكدير. علي ماكيلي بو وظيفه سينه آگاه ايميش و باجار ديقجا اونويئرينه يئتيرميشدير.

ايران توركلري ادبياتيندا درام ياراديجيليغي، شعر قدر انكشاف ائتمه ميشدير. معين دؤرلرده، تبريزده تئاتر صنعتي جانلانديقدا، بعضي صحنه اثرلري يازيلميشسادا، اساسا چاپ اولوب يا ييلماميش و خلقدن اؤرتولو قالميشدير. دئمك اديب ماكيلي نين فاجعه‌لي ازدواج اثريني يازماقدا الهام منبعي آذربايجان جمهوروسو ، و تركيه دراماتيك اثرلري اولموشدور.

شبهه‌سيز اديب بو اثرلردن اوخوموش و چوخ احتمال باكي، تبريز و استانبولدا درام اثرلرينه صحنه لرده تماشا ائتميشدير. ائله بوناگؤرده‌ده حاضركي اثريني يازديقدا دراما فني جهتدن نسبتا موفق اولموشدور. بونا باخميياراق اثرين اوچونجو و دؤردورنجوپرده‌لرينده ائله يئرلرده وارديركي، اونلارين صحنه‌يه قويولوشو رژيسوردان بؤيوك استادليق، ابتكار و مهارت طلب ائدير. بوقسمتلر فاجعه‌لي ازدواج اثريني صحنه ده نمايش اوچون دگيل، مطالعه اوچون يازيلميش بير اثره اوخشادير.

بيلديگيميزكيمي، دراماتيك اثرلر ايكي جور اولور. بعضي‌لري آنجاق مطالعه اوچوندور، اونلاري صحنه ده نمايش ائتديرمك چتين و يا غير ممكندور، چونكي اونلار صحنه تكنيكينه اويغون دئيلدير. ولترين بيرسيرا نمايشنامه‌لري و ميرزه آقا تبريزي نين پيسلري بئله اثرلردن دير. بومؤلفلر صحنه تكنيكي ايله تانيش اولمور، اونون چتينليكلري و اينجه ليكلريندن خبرسيز اولورلار، اونلا آنجاق حيات حقيقتلريني عكس ائتديرمگي قارشيلاريندا قويورلار.

نمايشنامه مؤلفلري نين بعضي سي‌ بلاواسطه صحنه تكنيكي ايله‌باغلي، و علاقه‌دار اولورلار، صحنه‌يه قويولوشون چتين ليكلريني بيلير و يازديقلاري اثرلرده اونونظره آليرلار. مولير، شكسپير و جعفر جبارلي بئله دراماتورقلاردان اولموشلار. بونا گؤره‌ده اونلارين يازديقلاري اثرلري، چتينليك چكمه‌دن، صحنه‌ده نمايشه ‌قويماق اولور.

اديب ماكيلي علي اولسا- اولسا بير تماشاچي اولموش، صحنه تكنيكي و اونون اينجه ليكلريله ياخيندان تانيش دئيلدي. بونا گؤره‌ده اثرين بعضي يئرلري صحنه تكنيكي ايله اويغون دئيلدير. يعني فاجعه لي ازدواج پيسي بيرينجي و ايكينجي نوع درام اثرلري نين قاريشيغيندان عبارت بير اثر دير. اگر اثرين بيرينجي و ايكينجي پرده‌لري آسان نمايشه قويولابيلرسه، اوچونجو و دوردونجو پرده‌لرينده كي بعضي شكيللر صحنه‌نين كيچيك امكانينا سيغيشماز. مثلاً اوچونجو پرده ده كند آروادلاري نين بيرطرفده و كيشيلرينين ديگر طرفده توپلانماسي، گليني تنديرباشينا دولانديرماق، گليني امامزاد يا آپاريب مراسم اجرا ائتمك، جوانلارين قوزوداشيندان قاچمالاري، قاسم كيشي نين ائوينده ياتيب اينله مه‌سي، چالقيچيلارين چاليب جوانلارين ياللي اوينا ماسي… ني‌عين بير زماندا دار و كيچيك بير صحنه ده نمايشه قويماق ممكن دئيلدير. مولفين اوز سؤزو اولان امامزاده ده رسومات عمله گليب تازا ائوه طرف حركت ائديرلر فكريني تاماشاچيلارا نئجه چاتديرماق اولار؟ بوعليحده بيرشكيل دير، خصوصي دئكور حركتلر و سؤزلر طلب ائديركي، بونلارين ياراتماسي رژيسورون عهده سينه بوراخيلميشدير و بوايش غيرممكن و يا چوخ چتين دير.

 بونقصانلارا باخميياراق اثر، اجتماعي حقيقتلرله دولودور. فاجعه‌لي ازدواج دوغرودان دا، محمد رضا شاه دؤرو آذربايجان كندليسي‌ني فاجعه‌لي حياتي، آجيناجاقلي ياشايشي‌نين‌رئال صحنه لرين تصوير ائدير. اربابين ظلمو، اونون دستكلري حقه بازلار و متملقلرين حيله‌لري خرافات لا ال- اله وئره‌رك اصل زحمتكش آذربايجان كندليسيني سويوب قارا گونه سالير و جوانلاريني باش آليب شهرلره گئتمه‌گه مجبور ائديرلر. قاسم كيشي بئله ازيلن كندليلرين سمبولودور. ارباب قاسيم‌كيشي نين تورپا غيني اليندن آليب اوغلانلاريني شهره گئتمه‌گه مجبور ائتميشدير. او، قوجاليب آغاجي اليندن دوشموشدورسه‌ده، ارباب اونون سون نفسي گلنه قده‌ر اوندان ال گؤتورمور.

ارباب سيم كيشي نين جوان قيزي فاطماني، شهرده‌كي ائوينه قوللوقچو ايسته‌يير، قاسم كيشي، آغير اقتصادي وضعيتينه باخميياراق، اربابين بو تكليفيني رد ائدير. چونكي او، فاطمانين دايي‌سي كرم كيشي و بوتون كنداهلي اربابي فكريني ياخشي بيليرلر. ايندييه‌قده ر ارباب كرم‌كيشي و بوتون كند اهلي اربابين فكريني ياخشي بيليرلر. ايندييه قده‌ر ارباب نئچه‌جوان كندلي قيزيني بيري- بيرينين آرد‌ينجا، شهرده‌كي ائوينه قوللوقچو آپارميش و بير مدت سونرا اونلاري ائويندن قووموش، فساد باتلاقليغينا توللاميش و كيمسه نين اونلاردان خبري يوخدور.

فاطمادان الي اوزولن ارباب اوز دستكلري واسطه سيله آيري حيله‌لري ال آتير. جادوگر و ماجراجو عمه كلثومون ديلي و جادولاري ايشه دوشور و كنده‌ده ياييليركي، فاطما، قولچوماق، غدار و رحمسيز كرم كيشي‌نين اوغلو قورباني سئوير و اونونلا گؤروشور. اركؤيون بؤيوموش يئل بئيين فاطما بو تورا دوشور، تله‌سير، كرم‌كيشي ايله گؤروشوب مسئله ني آچير، كبين كسديرمك اوچون تك باشينا شهره گئدير. حيله‌نين قورولماسيندا شريك اولان كرم‌كيشي توي خرجي وئرمكدن بويون قاچيرير، قاسم‌كيشي يگانه گذران منبعي اولان اينگيني ساتيب تويا خرجله يير، اربابدان تويا اجازه آلماق اوچون، كدخدا آدي گؤزه‌ل قاسم كيشي نين‌ ائشه‌گيني آپارير. قاسيم كيشي نين حياتدا هئچ‌نه‌يي قالمير. توي بيتير.

ايلك گوندن كرم‌كيشي، آروادي خانيم جان و قوربان فاطماني دؤيور، داغلايير و اؤلدورمك ايسته ييرلر. فاطما آتاسي‌نين ائوينه قاچير. قوربان گليب اونو اؤلدورور. بو منظره‌ني گؤره‌ن قاسم‌كيشي ييخيليب اؤلور.

قاسم كيشي نين فاجعه سي ساده، زحمتكش و ناموسلو آذربايجان كندلي سينين عمومي فاجعه سيدير. بوفاجعه، شرور و ارباب طرفداري اولان كندلي‌لرين ده ياخاسيني توتور، قوربان اؤزونو اؤلدورور و آناسي خانيم‌جان ده‌لي اولوب چؤللره دوشور.

دئمك اديب ماكيلي علي فاجعه‌لي ازدواج اثرينده تكجه فاطمانين شخصي حيات فاجعه سي دگيل، محمد رضا شاه دؤر و بوتون آذربايجان كندليلرينين حيات فاجعه‌سيني قلمه آلميشدير. اربابليق و خرافات ال- اله وئره رك آذربايجان كندلي سيني قارا گونه سالير، آذربايجان كنديني ويرانه قويوب جوان قوه لريني شهرلره قاچيردير تا امپرياليستلر و اونلارين عامللري طرفيندان استثمار اولسونلار.

اثرين تك تك اوبرا زلاري و ايكينجي درجه لي حادثه لريندين دانيشماق ايسته ميرك، سؤزلريميزين سونوندا بيرداها قيد ائتمك ايستيريك كي، فاجعه لي ازدواج اثري چاپ اولماغا و اونون مولفي علي ماكيلي تحقيقات اولونماغا لايق بيرسيما دير. بونا گؤره‌ده آرزو ائديريك كي، مرحوم اديبين اولادي، قوهوملاري و آشنالاري اونون اثرلريني اوزه چيخار ماقدا اللريندن گلني اسيرگه مه ييب آذربايجان درگي وگونده ليك لري ايله همكارليق ائتسينلر.

پروفسور محمد تقی زهتابی- شبستر ۲۰/۱۰/۱۳۶۰

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture