/  
بیریمجی صحیفه » مقاله لر و باخیشلار » پیشه وری نین میراثی و آزربایجان.
نشستی به منظور گرامیداشت ۲۱ آذر در شهر استانبول تورکیه .

پیشه وری نین میراثی و آزربایجان.

۲۱ آذر آزربایجانین چاغداش تاریخینی ان فخر ائدیجی و شرف زیروه سی دیر.

بو گون و اونون آنلامی بیزه میلی سیاسی اولاراق بؤیوک پیشه وری نین بوراخدیغی بؤیوک و شانلی بیر میراثدیر.
بو میراثین آدی “میلی حؤکومت” یعنی “میلی دؤولت و میلی دؤولتچی لیک دوشونجه سی” دیر.
میلی حؤکومت بیر میلتین، میلی اگمن لییینی قوروب و بو میلی حؤکومت واسیطه سی ایله میلی طالعیینی تعیین ائتمک ایمکانی دیر. بئله بیر ایمکانی درک ائتمه یی و اونون اوغروندا چالیشیب و حرکت ائتمک دوشونجه سینی بیز تورک میلتی پیشه وری و یوز مینلرله اونون یول آرخاداشلارینا بورجلویوق.
میلی دؤولتچی لیک دوشونجه سی اولمایان بیر یئرده، میلی دؤولت قورماق ایمکانسیزدیر.
بونا گؤره ده پیشه وری ۱۲ شهریور ۱۳۲۴ دن باشلایاراق عمومی بیر توافق و میلی بیر تفاهم چرچیوه سیندن یولا چیخاراق یوز مینلرله آزربایجان فدائی سینین مجادله و مبارزه سایه سینده ۲۱ آذر۱۳۲۴ ده “آزربایجان میلی حکومتینی” دئموکراتیک بیر حرکت چرچیوه سینده قورا بیلدی.
پیشه وری بیزه میلی بیلینج و اراده اولان یئرده، ظاهیرده بوتون ایمکانسیز گؤرونن هر شئی، ممکن اولا بیلر و گئرچکلشه بیلر حقیقتینی اؤیره تدی.
بونا گؤره ده ۲۱ آذر ایمکانسیزی، مومکون قیلان تورک میلتینین آزربایجان وطنینده ان بؤیوک معجزه سی دیر .
 
میلی حوکومتین دوشونجه سی ایسه، آزربایجان میلی اؤنجوللرینین  یولونا اون ایللرله ایشیق ساچان، یول گؤسترن و میلی حرکتلره معنا باغیشلایان بیر دوشونجه دیر.
۲۱ آذر بیر میلتین اراده سینین ظولمه، استعمارا، دیکتاتورلوغا، شونیزمه، فاشیزمیه و ایشغالا غلبه سی و میلی ظفر بایرامی دیر.
پیشه وری بیز اراده ائتسک باشارا بیلریک، درسینی ۲۱ آذر ۱۳۲۴ ۱۹۴۵ ده بیزه اؤیره تدی.
بیزلر ایسه بیر میلت اولاراق بو میراثی رد ائتمک حاقیمیز یوخدور. چونکی بو میراثی رد ائتمک له ابده دک استعمار و استبداد زینداندا قالماغا محکوم اولاریق.
پیشه وری میراثیندا میلی حاکمیت یالنیز دئموکراسی تملينده و میلتین حمایتی اساسیندا قورولوب و قورونا بیلر اؤیره تیسی واردیر.
دیکتاتورلوغا قارشی دئموکراتیک و استعمارا قارشی میلی موباریزه آپارماق فورمولونو پیشه وری و یول آرخاداشلاری بیزه سوندولار.
دئموکراسی و میلی لییی بیرلشدیریب و میلی یول ایله دئموکراتیک ده یر و دوشونجه لرین بیرله شیمینی ایسه بیز گونئی آزربایجان دا محض پیشه وری دن اؤیره نیریک.
بونون اوچونده ۲۱ آذر یالنیز بیر خاطره دن عبارت اولان بیر گون یوخ ، میلی دئموکراتیک بیر موباریزه نین تام دا آدرسی دیر.
ایللرجه جمعیت اولاراق پیشه وری میراث و دوشونجه سیندن امتناع ائدن گونئی آزربایجان ، هر گون داها چوخ فاشیزمین قانلی جایناقلارینا معروض قالدی و هر گون داها ال، آیاق و ذهنینه وورولان زنجیرلره محکوم اولدو.
کیملییینه ،طالعینه، وطنینه و بوتون میلی معنوی وارلیغینا قاندال ووروب محوینه چالیشان فاشیسم و شونیزمین باتاقلیغینا داها محکوم اولدو.
بو ایسه بیزه یا ۲۱ آذر دوشونجه و میراثی و بو دوشونجه میراثین گونجللشمیش شکلینه وفادار قالاجاغیق یا دا استعمار و استبدادا محکوم اولاجاغیقی اؤیره تمک ده دیر.
پیشه ورینین میراثی بیزه میلی حاکمیت دیر.
میلی حاکمیتی اولمایان بیر میلت ایسه، زامان سوره سینده اؤزگه لره تسلیم اولوب و اؤزگه لر ایچینده حل اولاراق محو اولماغا محکوم دور.
#آیدینلیق
Comments,Baxışınız
oguz gif telegram
Play All Replay Playlist Replay Track Shuffle Playlist Hide picture