/  
بیریمجی صحیفه » مقاله لر و باخیشلار » ۴۶جی ایلین اویونلاری

۴۶جی ایلین اویونلاری

 

سکینه یئنه راضی لاشمادی.


_نه اولسون کی اؤلوبلر… بیز دانیشمیشیق کی من اؤلمه یه جه یم. منه گولله آتمامیسینیز کی!
دوشمن بو دفه قهقهه چکدی. باشینی ییرغالایاراق جیر سسله دئدی:
_ آی های! بیز آتوم بومباسی آتمیشیق ائی! باخ اورا لاپ سنگرین یانینا، گرک سنده اؤلسن.
سکینه حیرصلندی. یئریندن قالخدی. کوکلا الیندن دوشدو.
او، تئز کوکلانی گؤتوروب توزا بولانمیش ساری ساچلارینی تمیزله دی.
یوخ، دئدی بیز اوولجه دن دانیشمیشیق کی من اؤلمه یه جه یم.
جیغاللیق سن ائله ییرسن! آرایا سوکوت چؤکدو. باشقا بیر دوشمن قاباغا گلیب آوتوماتینی «اؤزو ایشلییه
ن توفنگ» بیر نئچه دفه گؤیه بوشالتدی.
_یاخشی، دئدی _ قوی سن دئین اولسون. آمما آتوم بومباسی پارتلایاندا رادیوآکتیو شوعاعلار اولور. آدامی کور ائله ییر…
«رادیو آکتیو شوعاع» ایفاده سی دئیه سن هئچ کس باشا دوشمه دی. آوتوماتلی دوشمان هامی نین اونا تعججوبله باخدیغینی گؤروب کیپریکلرینی قیرپتدی٬ اودقونا اودقونا باشا سالدی:
نه دی… آتام دئییر کی، آتوم بومباسی پارتلایاندا رادیوآکتیو شوعاعلار اولور. آدامی کور ائله ی…
سکینه یئنه باشینی تولاییب عیناد کارلیقلا سؤزونون اوستونده دوردو.
_یوخ٬ دئدی _ جیغاللیق ائله مه یین!
بو دفه باشقا بیر دوشمن دیله گلدی:
_ یاخشی، ایسته میرسن ایسته مه…آمما سنین اوچ اوغلون اؤلوب آخی. گرک سن دلی اولاسان!
سکینه آنی بیر ترددود دن سونرا راضی اولدو.
او، سلیقه ایله دارانمیش ساچلاریندان قیرمیزی لئنتی آچدی.
ساچلارینی داغیدیب. چیینینه تؤکدو، دلی اولدو. دوشمنلر «اوراا» دئیه قیشقیریب یئره دوشدولر و هاراسا قاچدیلار.
بالالارینی ایتیرمیش آنا یئنه لای لای چالماغا باشلادی:

لای لای دئدیم یاتاسان
قیزیل گوله باتاسان…

سونرا پیچیلتی ایله دئدی:
_باخ، قارداشلارین اؤلوب. داها گلمه یه جکلر.آتوم بومباسیندان اؤلوبلر. ایندی سن منیم بیرجه بالامسان. منیم ایندی هئچ کسیم یوخدور. تکجه سن قالمیسان. گؤرورسن آنان دلی اولوب. ایندی گرک آنانین سؤزونه قولاق آساسان… چوخ آغلامایاسان. بو ساعات گئده_جه ییک ائوه. سنه شیرین قوغال وئرمه جه یم. سونرادا قارداشلارینی باسدیراجاییق… یاخشی؟… هه، ایندی گئده ک.
سکینه آیاغا قالخدی، کوکلاسینی دا قالدیردی.

لاکین کوکلانین گؤزلری آچیلمادی. ایچینده ائله چینگیلده ییردی، دئیه سن قیریلمیشدی. سکینه اونو سیلکهلهدی، بیر نئچه دفه اییب قالدیردی. لاکین گولزارین گؤزلری یومولو قالدی.
آنا ایچینی چکیب آغلادی٬ قیشقیردی.
_آچ دا گؤزلرینی!
گولزار گؤزلرینی آچمادی. اوچ قارداشین بیر باجیسی سکینه نین سون بئشییی کور اولموشدو.

سون.

یازار: #یوسوفصمداوغلو
کؤچوروب، اویغونلاشدیران:#تانسو_خیاوی

Comments,Baxışınız
oguz gif telegram