/  
بیریمجی صحیفه » مقاله لر و باخیشلار » آزربایجان میلتی آدینا, پیشه‌وری دن دنیایا ایکی مهم نامه
آزربایجان میلتی آدینا پیشه‌وری دن دنیایا ایکی مهم نامه

آزربایجان میلتی آدینا, پیشه‌وری دن دنیایا ایکی مهم نامه

پیشه‌وری اوغوزتی وی:۱۹۴۵-۱۹۴۶ جي ايلده گونئي آذربايجاندا قورولان، ميللي جومهورييتين باش وزیری  س.ج.پیشه‌وری ، آذربايجاندا ،تورک ميلتينين ميللي ايراده‌سييله قورولان آذربايجان ميللي حکومتيني دونيايا تانيتماق و قبولانديرماق اوچون ،يئني يارانميشسازمان ملله و ائلجه‌ده بؤيوک و گوجلو دؤولتلره مکتوب يازاراق مراجعت ائدير.

 

“اگر تهران خاريجي ايمپئرياليستلرين گؤستريشي و کمکي ايله,  بيزيم حرکاتي (آزربایجان ملي حرکاتي)مغلوب ائتمه‌يه موفق اولسا بئله ، خالقيميزين حاقيني ابدي اولاراق غصب ائده بيلميه‌جک. تئز‌-گئج آزربايجان اؤز ايستيقلاليتيني آلاجاق، اؤز مقدراتيني اؤزو تعيين ائده‌جک”.      س.ج.پیشه‌وری

بؤيوک دؤولتلرين خاريجي ايشلرناظرلرينين(وزیرلرينين) لندن دکي توپلانتيسينا مکتوب 
(تبريز، ۲۳ سئنتيابر ۱۹۴۵-جي ايل)
آمريکاخاريجي ايشلر وزیري جناب برئنئس، اينگيلتره خاريجي ايشلر وزیري جناب بووئن، سووئت ايتيفاقي (شوروی) خاريجي ايشلر وزیري جناب مولوتووا، فرانسا خاريجي ايشلرناظري جناب بيدايا، چين خاريجي ايشلر وزیري جناب وانگييه. 

بؤيوک دئموکراتيک دؤولتلر قانلي فاشيست اصول ‌ ايداره‌سيني محو ائتديکدن سونرا دونيانين چوخ مملکتلري عاديلانه دئموکراتيک اوسول‌ايداره‌سي ياراديب. قاباقلار دا ظولم آلتيندا ازيلن جهانين چوخلو قؤوم و ميلتلري تاريخي آتلانتيک منشرونا(منشور پایه  سازمان ملل ) مووافيق اولاراق اؤز موقددراتلاريني تعيين ائتمه‌يه (حق تعیین سرنوشت )باشلاييب.

هر خالق اؤز ميللي مدنيتيني، ايقتيصادياتيني و گوزرانيني قالديرماق اوچون دئموکراسي رئژيمين نعمتلريندن ايستيفاده ائتمک ايسته‌يير. متاسفانه ايراندا گون بگون ديکتاتورلوق تهلوکه‌سي آرتماقدا و فاشيست عنصرلري ريضا شاه-ين منحوس حاکيميتيندن سونرا الده ائديلن ناتامام آزادليغي بئله بوغماق اوچون هر جور فيتنه‌لره ال آتماقدادير. هم ايالتلرده و هم ده پايتاختدا آزادخاهلار تعقیب اولونور. دئموکراتيک حرکاتي تمثيل ائدن روزنامه‌لر (قزئتلر) و جمعيتلر سيلاه گوجو ايله داغيديلير.

ارتجاع قوووه‌لري تزه‌دن سابيق ريضا شاه-ين ايستيبداد رئژيميني ايستمک اوچون, ناموسلو آزاديخواهلارينين قانيني تؤکمکدن چکينميرلر. 
ايراندا بئش ميليون جمعیت ونوفوزا ماليک اولان بيز آذربايجانليلارين وضعيتي داها تحمل ائديلمزدير. آذربايجان ميلتي اوزون ايللردن بري ايرانداکي آزادليق نهضتينين (حرکتینین) المداري اولماغينا باخماياراق اؤز تورپاقلاريندا فقير و بيچاره‌ليک حاليندا، هر جور حوقوقدان محروم حالدا ياشاماقدادير.

ايراندا بو واختا قدر آقاليق ائدن  ارتجاع حاکيميتي نتيجه‌سينده آزربایجان ميلتي اؤز ميللي مدنيتي ترقي سينه چاليشماق، خارابا شهرلريني آبادلاشديرماق و خالقين  کند تصروفاتي,بئهداشت  و ساير احتيياجلاريني رفع ائتمک و حتّي اؤز اوشاقلاريني آنا ديلينده بئله اوخوتماق اوچون هئچ حاق و ايختييارا ماليک دئييل.

دونيانين قديم خالقي اولان و مينيللر عرضينده بؤيوک مدنيت و صنعت اثرلري ياراتميش آزربایجان خالقي ايندي ايستيبداد و ديکتاتورلوغون آرادان گؤتورولمه‌يه باشلانديغي بير زاماندا اؤز حوقوقلاريني طلب ائديب و بو موقدس يولدا موباريزه‌يه قالخيب. 

بيزآزربایجانلي لار, آتلانتيک منشروندا گؤستريلن هر بير ميلتين اؤزمقدراتيني اؤزو تعيين ائتمک عقيده سينه (حق تعیین سرنوشت ) دَرین بير ايمان بسله‌ديگيميزي وبوآجي وضعيتيميزي بؤيوک موتففيق دؤولتلرين تشکيل وئرديگي وزيرلر شوراسينا يئتيريريک.

بيز بوتون ايراندا حقيقي دئموکراسي اوسولون برپاسينين و آزربایجان خالقينا داخيلي آزادليق و موختاريیت وئريلمه‌سيني، عوموم مملکتين عاديلانه قانونلاريني گؤزله‌مکله برابر، آزربایجانين اؤز طالعييني اؤزو تعيين ائتمه‌سيني ايسته‌ييريک. بيز بؤيوک موتفيق دئموکراسي دؤولتلرين, خالقيميزين بو تاريخي و عاديلانه طلبينده بيزه کؤمک ائتمه‌لريني، بئش ميليوندان آرتيق آزربایجان خالقي آديندان طلب ائديريک.

آذربايجان خالقي اميندير کي، بوتون ميلتلره و قؤوملره ميللي آزادليق و خيلاصکارليق ودائتميش بؤيوک موتفيق دئموکراسي دؤولتلر بيزيم ده طلبيميزي و طبيعي حاقيميزي نظرده توتاجاق و اؤز کؤمکلريني بيزدن اسيرگميه‌جکلر.

(تبريز، ۱۳۲۴-آزربایجان خالقي آديندان موراجيعتي ۱۵۰۰ نفردن چوخ خالق ائلچيسي و ملت وکیلی ايمضالاميشدي).

«قيزيل صحيفه لر»، تبريز، ۱۳۲۴-جو ايل، س. ۶۲-۶۴.

آزربایجان ميللي  حکومت ينين باشچيسي پیشه‌وری نين, سازمان ملل (بيرلشميش ميلتلر تشکيلاتي) باش آسامبلئياسينا نامه سی‌

  

دونيانين ان قديم خالقلاريندان اولان آزربایجان میلتی  اؤزونون زنگين ميلي تاريخينه مالکدير. عصرلرين کئشمکئشينده او، اؤز ميللي ديليني، عادت و عنعنه لريني قورويوب ساخلايا بيليب.ايران ظولمکارلاري آذربايجاني اؤز حاکيميتلري آلتينا آلاراق، اونون ثروتيني آمانسيزجاسينا تالاديلار. نتيجه‌ده آذربايجانين چيچکلنن کند و شهرلري داغيلماق حدينه گليب چاتدي.

شووينيست( کشور گشائی) بؤيوک دؤولتچيليک سيياستي يورودن ايران حؤکمدارلاري آذربايجانليلارين مؤجودلوغونو تاماميله اينکار ائتمه‌يه جهد گؤسترير، اونلارين ديليني اليندن آلماقدان، هر جورتحقيرائديجي عمللردن چکينميردي. بونا باخماياراق آزربایجان خالقي بير گون ده اولسون، اؤز آزادليغي اوغروندا موباريزه‌سيني دايانديرمادي.

آزربایجانليلارين اؤز ميلي آزادليقلاري اوغروندا موباريزه‌سينين ان پارلاق نمونه‌سي ستارخان,باقرخان, شيخ محمد خياباني و باشقالارينين حرکاتيدير. بو جسور اينسانلار موباريزه‌نين باشچيلاري، هم ده شهيدلري ايدي.

قانلي فاشيزمين اوزرينده, دئموکراتيک دؤولتيرين غلبه‌سي آذربايجان خالقينين موباريزه‌سينه يئني تکان وئردي، يئني شراييط ياراتدي. تهران حؤکومتينين مقاويمتينه باخماياراق بو ايلين ۲۱ آذرينده (۱۲ دئکابر) آذربايجان خالقينين عصرلردن بري آپارديغي موباريزه‌سيغلبه‌ ايله باشا چاتدي، آتلانتيک منشرونا(منشور پایه  سازمان ملل ) اويغون اولاراق ميللي مجليسين، آذربايجان ميللي حکومتينين قورولماسي ايله نتيجه لندي. 
آزربايجاندا دئموکراتيک اساسلارا دايانان بير ميللي حکومت  قورولوب و اؤز فعاليتي باره‌ده بوتون دونيايا معلومات ياييب. ۵ ميليونلوق آذربايجان خالقي ميللي ديلينين، تاريخينين، مدنيتينين کؤمگي ايله اؤزونون معاصر بير خالق اولدوغونو درک ائتدي و بير ده هئچ واخت فارس ظولمونون آلتيندا اينله‌مي، فارس ديلينين ايرانداکي باشقا خالقلارين ديللري اوزرينده آقاليقلارينا, اجازه وئرميه‌جک.

بو خالق بير نفر کيمي اؤز حياتيني ميللي آزادليغينا و دؤولتينه قوربان وئرمه‌يه حاضيردير. يئني ميللي حکومتين فعاليتي سايه‌سينده عصرلرله ايستيثمار اولونان خالق عادي اينساني شراييطده ياشاماغا باشلاييب.

بونونلا دا او، اؤز ميللي دؤولتيني قورماغا، اونو ايداره ائتمه‌يه قادير اولدوغونو گؤسترير. آزربايجان خالقينين ايراده‌سي ايله آتلانتيک پارتيياسينا، يني بؤيوک دئموکراتيک دؤولتلرين ودلرينه اويغون اولاراق قورولان آذربايجان ميللي  حکومتي آرتيق دانيلماز فاکتدير.سازمان مللین باش آسسامبلئياسينا موراجيعتي ايله آزربايجان خالقي خواهيش ائدير کي، آزربايجان ميللي حکومتينين مؤوجودلوغو فاکتي تانينسين و کناردان موداخيله اولمادان، اونا اؤز طالعيينين اؤزو طرفيندن معينلشديريلمه‌سينه تامینات وئريلسين.

س.ج. پیشه‌وری
آذربايجان ميللي حکومتينين باش وزیری  
۲۸ ژانویه ، ۱۹۴۶-جي ايل – تبریز

 

Comments,Baxışınız
oguz gif telegram
Play All Replay Playlist Replay Track Shuffle Playlist Hide picture